Aizawl 10th November , 2023 : Vawiin November 10, 2023 (Zirtawpni) hian ZPM Headquarters Office-ah Lawmthu sawi inkhawm an nei a. He hun hi Rev. Dr. K. Thanzauva, Vice President, ZPM General Headquarters chuan a kaihruai a. Rev. Darchungnunga, VUC Member chuan hunserh hmangin, Pu Lalliansawta, President ZPM General Headquarters leh Dr. Kenneth Chawngliana, Vice President ZPM General Headquarters ten thu an sawi.
Pu Lalliansawta, President chuan, “Inthlanpui vawihnih kan hmachhawn tawh a, tunah chuan sawrkarna chan te kan beisei ta. A party zawng chuan naupang hle mai ila, ZPM kan dintirh te ka ngaihtuah let a, party hrang hrang awmkhawmin, politics-a la inhmang ngai reng reng lo te, a then experience tam tak lo nei tawh te kan kalkhawmin kan awmkhawm a; buaithlak viau tura ngaih a nih laiin, buaina kan nei reng reng loa kan kal dan hi a fuh hle a ni,” a ti.
Dr. Kenneth Chawngliana chuan, “Pawisa hi inthlannaah chuan a pawimawh khawp mai a, kan party-ah hian budget a tlem em em a, sum ngaihtuahtu tur kan inruat a budget te han siam ve mahse khawi atang mah a lakluhna an nei bik chuang lo a, Party dangte MLA pakhat senso hi kan candidate zawng zawng hian an hmang tling lo hial a ni. Vairam atang pawhin company lian tam tak rawn kalin min finance theih thu te an rawn sawi a, min sawm nasa em em a. Amaherawhchu, kan hotuten a hnu leh beiseia hetiang rawn kal te hi rethei hle mah ila hnawl ngam ang u, an tih avangin kan hnawl vek a ni. Tunah hian khatiang tello a kan kal thei hi a lawmawm em em bawk a ni. Tuna a landan chuan ZPM hian mahniin absolute majority sawrkarna kan siam dawn a ni. Tun hma kha chuan unit pawh nei mang lovin Candidate te kan han nei a, mahse khati zat MLA a an tling thei te kha a ropui a. Tunah erawh chuan Party a zawnga unit ngah ber kan ni ta te hi a lawmawm em em a ni,” a ti.
