ZPM Political Affairs Committee (PAC) thukhawm chuan Aizawl East I bial viltu tura an ruat PL Liandinga phatna a thlen an pawm sak a. ZPM nomination committee hmalakna kal zel tha an tih thu an sawi.
Vawiina ZPM PAC thukhawm chuan, “Aizawl East I-ah ZPM in chakna a chan ngei theihna tura viltu tur a ruat Pu PL Liangdinga’n a taksa chak tawk lohna avanga a vil zui theih dawn loh thu ziaka phatna a thlen chu lainat tak chunga pawm sak a ni,” tiin, ZPM party nomination committee hma lakna kal zel hi a tha an tih thu leh ram pumah candidate tha tak tak an chhawp chhuahsak ngei pawh an beisei thu an sawi.
ZPM PAC thukhawm chuan Mizoram MLA General election thla nga chauhin a dang tawh a, ZPM hmasawnna kal zel thlirin Pathian leh mipui zarah sorkar an chang ngei turah an inngai tih sawiin, “Sorkarna kan lo chang a nih chuan kan intiam ang ngeiin Kalphung Thar -Mipui sorkar kan siam ngei dawn tih Zoram mipui hnenah kan tiam thar leh a ni,” an ti.
