Tun hnaia Reiek RD Block BDO Complex Retaining Wall (Lungrem) hnathawh chim enfiah turin ZPM General Headquarter chuan Endiktu Team siamin a hmunah an kala, thil awmdan an zirchiang nghal.
Endiktu Team hian Reiek RD Block BDO Lalrinzuali leh Office Technician-te kawmin, anni chuan, he hna hming hi BDO COMPLEX RETAINING WALL, PMKSY hna RD Department hnuaia ZPM Reiek Unit President Zothansanga hminga thawh a nih thu an sawia, sanction amount hi Rs.100,000 (Nuaikhat) a nih thu leh, hei hi SOR 2019 hmanga estimate siam a nih thu an sawi.
BDO Lalrinzuali chuan,”Retaining Wall chim chhan hi hnathawh chhiat vang a ni lova, 23rd March,2024 khan he hna hi zawhfel a ni a, zawhfel a nih hnu hian a khat tawkin ruah a sur fo a, Lungremna lai leilung hi leivung awmna lai niin a lei a nghet lo sa hrim hrim a, 6th May,2024 khan he retaining Wall hi a chim ta a, pawi kan ti hle a, hnatawh chhiat vangah kan ngai lova, vanduai vang ah BDO Office lam chuan kan ngai a ni, chuvangin keini lam pawhin a khuhna tur Silpauline pein Water Shed Development Fund atangin Lungrem chim siamthatna tur kan dil sak mek a ni,”a ti.
Hna thawktute lam pawhin thil awm dan sawiin, Ruahtui tlak vang leh a chhaka Water tank siam thar atang hian tui a put niin an hria a, he hna leh sum sanction amount hi inmil lo deuh niin an hre bawk a ni. Theih tawpa an uluk chung pawha hetiang thil a thleng hi pawi an tih thu an sawia, hnatlanga siam that leh hial pawh an tum laiin, BDO hian Water Shed Development Fund atanga a siamthatna tur a lo ngaihtuah sak hi an lawm hle a ni.
ZPM General Headquarter atanga endiktute hmuh dan chuan, he hna hi SOR 2019 hmanga estimate siam a ni hi tha lo an ti a, dan thar anga 33.03% belh ni sela chuan, lung rem hi a thuahin a rem theih dawna, Retaining Wall 28 ft a sei,12ft a sang rem nan chuan estimate hi a leilung awmdan enin a tlem deuh niin an ngai. Budget mila hna thawh angaih avangin he Retaining Wall hi a thuah a rem a ni lova, hei vang hian retaining wall hi chak tawk lo niin an hria, Estimate siam dan hi ennawn turin department hotute hnenah pawh thlen an tum nghe nghe a ni.
ZPM General Headquarter chuan, ZPM Sorkar hnuaia hna thawktute chu, tha tak leh rinawm taka thawk zel turin a chaha chhuzui ngai leh zilhhau ngai awm lova, rinawm taka kan ram leh mipuite tan hna thawk turin a chah bawk a ni.
