Lalnghinglova Hmar, Aizawi W II biala ZPM official candidate chuan vawiin khan Aizawl Press Club-ah chanchinthar lakhawmtute kawmin, ZPM in Sports lama a ngaihpawimawh turte a puang.
Lalnghinglova Hmar chuan, “Mizoramah sports-in nasa takin hma a sawn a, ZPM chuan lawmawm a ti hle. Hetihlai hian sports hmasawnna kan tih hi a kai rual tawk lo deuhin kan hria a, infrastructure lamah nasa takin kan thang a, sports person-te hian ngaihsak an hlawh tawk lo a, hei hi thlak kan tum a ni.
“2019-2023 chhungin Mizoram State Sports Council hnuaiah project lian tham 108 an thawk thei hi a lawmawm kan ti a, chutih rualin hetiang taka hna lian thawk chak thei kan nih rual hian kan infiammite dinhmun erawh a la hniam hle.
“Northeast Olympic Games, November 2022-a Shillong-a neih zawh takah hmar chhak state pariat zinga parukna kan ni phak chauh hian infrastructure lam chauh ni lo, a infiamnaah tak hmasawn kan mamawhzia a tilang.
“Sports-a hma kan sawn dawn chuan a hmunhma neih that a pawimawh rualin a buaipuitu sports association thuam chak hi ZPM chuan a tulin a hria. Tunah hian sports association thenkhat chuan national competition-a an tel dawnin sum leh paiah harsatna an tawk nasa hle a, mimal pawisa puk chawpte pawh an awm thin. Sorkar tan puih vek sen a ni lo chungin sports association-in an dawn tur Sports Promotional Fund hi ZPM a sorkar chuan ennawn kan tum.
“Hei bakah hian association-in anmahni puala hmunhma an neih hi ZPM chuan a ngai pawimawh a, a theih chin chinah state level recognised sports body-te’n an duh leh mamawh huna an hman theih turin sorkar sports hmunhmate hi sports association-te nen a hman dan sawiho thin a ni ang a, an ngaihdan dah pawimawh a ni ang,” a ti.
“The Mizoram Sports Incentive Award Scheme, 2022 chu September 6, 2022 atanga hman tan a ni a, sorkarin infiammi a tithate lawmman dawn theih dan tur ruahmanna fel a siam hi lawmawm kan ti,” tiin Lalnghinglova chuan, “Hetihlai hian Mizoram State Sports Council hnuaia recognised sports association ni ve thlap si, Sports Incentive Award pek ve loh an awm. Heng sports association-te tan hian ZPM chuan ruahmanna a siam dawn a ni.
Incentive Cash Award dawng thei tawh lo, ZPM an sorkar huna pek an tumte:
1. Body Building & Fitness Association of Mizoram
2. Mizoram Arm Wrestling Association
3. Mizoram Carrom Association
4. Mizoram Kick Boxing Association
5. Mizoram Motor Sports Association
6. Mizoram Power Lifting Association
7. Mizoram Sepaktakraw Association
8. Mizoram Tug-of-War Association
9. Mizoram Snooker & Billiards Association
10. Muaythai Association of Mizoram
“Mizoramah sports kan chawi san dawn chuan zirtirtu neih that a pawimawh a, kan coach neihte hi tun aia thuam that a, training tha zawk leh zirna sang zawk an neih theihna turin ZPM chuan hmaa la ang.
“Kan tuipui deuh game thenkhat en ta ila – Boxing-ah coach sang ber AIBA Star 3 kan la nei lo, AIBA Star 2 pakhat leh AIBA Star 1 pakhat kan nei; Football-ah pawh a sang ber Pro License Coach kan la nei lo a, a hnuai chiah A License Coach pawh 2 chiah kan la nei a; Volleyball-ah hian NIS holder 8 chiah kan la nei.
“Sports tuipui tak ni si, sports hminga sum leh pai tam tak sengtu state ni si hi National Games leh Northeast Games-ah pawh medal kan dawng tlem thei hle. Hei vang hian sports association zinga medal kan dawn theihna tura ngaihte hi tun aia tha zawka enkawl hi ZPM chuan tha a ti a, ram leh ram state leh state inelna lian thamah kan san theihna turin hma a la ang,” a ti bawk.
