ZPM Lagislature Party-in Lengpui Airport an tlawh

Aizawl, April 12 : Vawiin khan ZPM Legislature Party chuan Pu Lalduhoma, Leader hovin Lengpui Airport chei that mek a hmunah an tlawh. Lengpui Airport chei that mek hi March ni 10, 2022 khan a chim a, a chim bak zawng hi thuneituten thiat tura an tih anga thiah nia hriat a ni. Hetiang hi a nih avangin hnathawh dan chungchang enthlithlai turin vawiin khan ZPM Legislature Party te hi an kal ta a ni. Pu Duha chuan, “Sum tam tak senga Airport chei that hnathawh hetianga a chhe ta mai hi a pawi hle a, a hmuna enchian hian hna kalphung hrim hrim hi a chhia tih a hriat a ni. Hnathawhna cement char tawh te pawh hi kut lawnga hmeh pawhin a sawm mai mai thei a ni. Chutiang khawpa chhia chuan hna an thawk a, a chim chu thuhran nise, a chim bak pawh thiah leh ngai khawpin a lo awm phah ta a ni,”a ti. Pu Duha chuan, “Airport chim rual khan thuneituten a chim chhan an chhui ang a, hrem ngai an hrem dawn emaw mipuiin an tih laiin, kan thu hriat chu chhui a nih loh tur thu a ni. Kan ramah hian hmasawnna hnathawh a chhe em em thin a, ZPM kan sawrkar hunah chuan contract hi a hun lova zawh a awm dawn lova. Hnathawk tha lo leh a huna zo lo chu kan hrem nghal zel dawn a ni,”a ti. Pu Duha chuan Airport chei that hna thawktu Kamrul Islam Laskar chu CM-in a duhsak hle thu sawiin, “KR Construction hian hmun hrang hrangah hna an thawk nasa em em a, an hnathawh zawng zawng hi endik a nih loh chuan vanduaina rapthlak zawk kan la tawng thei ang tih kan rin avangin a hna dang pawh hi endik vek kan duh a ni. Airport bikah ringawt pawh hian hna a thawk tam em em a; February ni 8, 2021 khan RCC Box Culvert cheng 94,46,600 (nuai sawmkua pali singli sangruk zaruk) man a thawk a. April ni 21, 2021 atangin Upgradation of Operational & Non-Operational Facilities cheng 19,59,00,000 (Nuai sangkhat zakua sawmnga pakua) man eng tender leh work order mah awm lovin thla nga lai hna a thawh hnuah, September ni 20, 2021 khan notice to proceed (hnathawh chhunzawm zel tura hriattirna) ziakin pek a ni a. Hei pawh hi Work order ni lovin, ‘I hna lo chhunzawm zel rawh’ tihna mai a ni. Hetianga hna inpek hi kan hriat vawikhatna a ni. September ni 20, 2021 khan hna pathum a rualin a hmu leh nghal a – (1). Internal electrification, cheng 2,59,81,057 (nuai zahnih sawmnga pakua, singriat sangkhat sawmnga pasarih). (2). Centralised AC cheng nuai 4,14,46,271(nuai zali sawm pali singli sangruk zahnih sawmsarih pakhat). (3). Aviation complex atanga airport panna cheng 91,71,000 (nuai sawmkua pakhat singsarih sangkhat) a ni. Thla 7 chhungin heng hna lian pui pui te hi a hmu a. A vaia kan belhkhawm chuan cheng 28,19,44,000 (nuai sanghnih zariat sawmpakua singli sangli) a ni. Airport chei that hna dang hi Zoramchhana’n a thawk a, ani hian cheng 30,36,74,000 (nuai sangthum sawmthum paruk sing sarih leh sangli) chuang a thawk a ni,” a ti bawk. Pu Duha chuan Kamrul Islam Laskara hian hmun pariat (8) dangah contract hna a thawh bawk thu sawiin, “Kan hriat china a hna thawh zawng zawng hi cheng 1,16,43,96,000 (nuai singkhat sangkhat zaruk sawmli pathum singkua sangruk) man a ni. Heti khawpa duhsakna a hmu hi Kamrul Islam Laskara hian a hming a tum mai niin a lang a; a phenah hian a contractor tak tak, a hna neitu tak tak chu a awm niin kan ring nghet tlat a ni. Zoramah hian corruption laka fihlim sawrkar huaisen leh chak, corruption do ngam, mi corrupt te hrem ngam sawrkar kan mamawh tak zet a ni,” a ti bawk. Airport chei that enfiahnaah hian ZPM leader Pu Lalduhoma, Aizawl North-I MLA Dr. Vanlalthlana, Aizawl West – III MLA Pu VL Zaithanzama leh Aizawl South – II MLA Pu Lalchhuanthanga leh DPR enpuitu Er. H. Laldintluanga, MZU ten an kal a ni.