Congress Thalai chuan thuchhuah siamin, “ZPM sorkarin an inzawrh dan lo anga Mizoram chaklakna kawngpui ber siamthat ngai pawimawh lova, hlimhlawp leh mahni taksa tihdanglam lam an tuipui zawk avanga Mizoram harsatna namenlo kan tawh hnuah NH-306 kawng Buichali leh Kawnpui inkar kawng siam hna, Minister leh MLA ten nitin a vil tur ZPM Legislature Party-in an ruahman chu thil tha ang taka lang nimahse, anmahni ZPM sorkar ngeiin PWD Minister an rin zawh loh zia tichiangtu leh an thawhpui PWD minister rin tawk lohna ‘No Confidence an Move’ tih an lantirah Congress Thalai chuan a ngai a. Hetiang hi Mizoram sorkar awm tawha thil la thleng lo leh thil zahthlak a ni a. ZPM Ministry hi a chhunga a buai nasat zia pawnlamah thup rual lohvin a langchhuakah a ngai a ni,” an ti.
Thuchhuah ah chuan, “Sorkar inthlahdah avanga anmahni department chan pawh buaipui hman lo leka kawng chhe siam vil a, Forest Minister te, Sports Minister te, Social Welfare Minister adt. te kawng siam vil daih chu kalphung Thar hlauhawm leh dawngdahna nasa takah a ngai bawk.
“Congress Thalai chuan harsatna namenlo a thlen hnu leh thil nih dan tur zawng zawng a thlen vek tawh hnua Minister leh MLA ten kawng siam an vil a, PWD E-in -C leh DC ten kawng an tlawh thung chu Kalphung thar lehlin zia leh kalphung mumal an neih loh zia ti chiangtu a ni a. Driver tangkhang riltama siamtuten mipui bumna atan thlei bik neia eitur an sem chu lemchanna dik takah Mizoram mipuiin an ngai tih hre turin Congress Thalai chuan ZPM sorkar a hriattir a ni,” an ti bawk.
