Aizawl, 22nd May, 2023: Vawiin thawhtanni khan ZPM chuan chhung inkhawm hun kan hmang a, he hunah hian Lalliansawta, President leh TBC Lalvenchhunga, PAC Member ten thu an sawi.
Lalliansawta ZPM Party President chuan, “Sawrkar siam turin kan insingsa mek a; ZPM lo chu sawrkarna siam thei tur party dang an awm lo tih hi mipui ngaihdan leh hmuh dan a ni. ZPM hian kan dawhthleng tizauin hmun hrang hrang atanga lokal khawm mekte dawl zo turin kan inhawn zau a, puanven kan sawi chhin a ngai a ni,” a ti.
Thusawitu dang TBC Lalvenchhunga, PAC chuan, “Kalphung hluiah chuan Politics hi game-ah an ngai a, a khelh a khelh an tum thin. Keini kalphung thar zuartute tan chuan Politics hi game a ni ve lova, ram hmasawn nan politics hi kan buaipui zawk a ni,” a ti a. “Kan Chief Minister ber pawhin sawrkar ve chhin se min ti mek tawh a, ‘eng an ni bik lovang’ min ti a, eng kan nih bik zia hmuhtir kan tum a ni. ZPM chuan kan chunga roreltu tur thlan kan tum lova, kan aiawh, mipui duh dan anga roreltu tur chhawpchhuah kan tum a ni. Bial vil tur kan in ruat tawh a, heng mite hi ZPM chuan a zuar lova, kalphung thar zawk kan zuar a ni,” a ti bawk.
TBC Lalvenchhunga chuan, “Kan ramah rorelna dik leh politics tha, inthlanna felfai leh thianghlim kalpui ila MPF hi a pian a ngaih ka ring lova, ZPM pawh a din a ngai lovang. Mahse, vawiinah chuan a lehlingin Social Media lamah MPF-in ZPM a khak tiin dik mang hlei lovin party dangin kalphung hlui politics game an khel mek. An boruak han thlir vang vang hian tun atanga rei vak lovah kan khingpuite hi an darh huk dawn tih hi a chiang reng a ni! Kan ram hian hmasawn kan duh a, hmasawnna tura kan bul tanna tur erawh mihringte kan ni. Infrustructure ropui tak tak nei teuh mah ila a thawktu mihring kan neih leh si loh chuan thawktu tur ram dang mi an lo lut zut zut ang a, min chimraltu tur mai mai an ni. Kalphung thar mipui sawrkar hnuaiah chuan mipuiten hmasawnna rahbi thar an rah theih nan a bul thum (Grassroot level) atangin hma kan la dawn a, retheite chawikan chauh ni lovin tlema lo nuamsa tawh te tan pawh malsawmna nih kan tum a ni,” a ti bawk.
ZPM chhung inkhawm hi Er.Lalhmingliana, General Secretary chuan a kaihruai a ni.
