Vawiin, April 25, 2025 (Zirtawpni) hian MPCC chuan Congress Bhavan Golden Hall-ah Political an hmang a, he huna thusawitu Dr.Lallianchhunga, Spokesperson MPCC chuan, “Congress party kan sorkar lohna tura Mizorama Tualto party 2 ten BJP an thawhpui dan a lang chhuak zel a. Hei hi MNF leh ZPM te hian tun thlengin phatna an la siam lo niin ka hria. MNF sorkar hunlai, Nov 30, 2020 khan BJP National Spokesperson M.Kikon an Aizawl Press Club-ah ‘MNF te hi BJP vanga chak an ni,’ tiin a puang a. Kum 2023 a an tlak thleng khan MNF ten M.Kikon-a thusawi kha an an chhang let lo va. Tun hnaiah MNF President in BJP Pachal Pu Amit Shah nen an inkawmna chungchang April 7, 2025 khan Hnam Run-ah a sawi a. BJP in kum 2023 ah MNF an puih tawh loh chhan te, BJP in ZPM lam an hawi tak dan te a sawi a. Kha thu kha ZPM VUC member te tan ngawih bopui chi a ni lo; Kristian thinlung atanga BJP thawhpui duh miah lo hi ZPM ah an awm teuh ka ring, mahse tun thlengin ZPM in Pu Zoramthanga sawi kha an la chhang let lo. BJP in an rawn puih party te hi Term 1 chu an sorkar ve mai a, mahse Term 2 chu an sorkar nawn bik ngai lo,” a ti.
Healthcare chungchang sawiin, Dr.Lallianchhunga chuan, “Congress hunlaiin mipuite tlin tawk Healthcare kan kalpui thei a. Kalphung Thar Healthcare hi chu sorkar hnathawk awm ve lohna chhungkaw tam tak tan inziah luh man a to lutuk avangin an tlin ve lo va, a tlin ber tura ngaih sorkar hnathawk ten an do bur bawk a, dan hmang thlenga do turin an inbuatsaih mek a ni. Pensioner tan Barluih Healthcare a ni ringawt bawk a, ‘tuna in tih nghal loh chuan, nakinah in inziah luh (register) duh hunah Late Fee in chawi ang’ tiin Healthcare an Barhlui a ni. Private Hospital lian ten Kalphung Thar Healthcare hi an pawm thei lo bawk a. Aizawl-ah chuan Civil Hospital leh ZMC a khum chan loh chuan healthcare a inziah luh awmzia a awm lo. Damlo tam tak ten Kalphungthar Healthcare vangin harsatna an tawk mek a ni,” a ti bawk.
Dr.Lallianchhunga chuan, “ZPM Minister te hian sorkar kal tawhte thiam taka bei ngar ngar chungin sorkar nawn leh an tum a ni ber a. Hmasawnna ruhrel din thupui berah an nei lova, Mizoram sum leh pai dinhmun tluchhe mek siamthat an thupui ber a ni lo. Mipui atangin chhiah an la awk awk a, chumi hmang chuan an party hotute sorkar atanga hlawh la thei turin Political Appointment an pe chur chur a, sorkar zarzo thei tura an party hotute siam hi an thupui ber zing a mi a ni. ‘Mipuite phurrit chhawng zangkhai tur leh sumdawngte tana sumdawnna boruak tha zawk siam leh turin Congress party kan sorkar leh a ngai a ni,” a ti.
Congress Bhavan a Political Session hi Pu C.Dothansanga, Gen.Secy MPCC chuan kaihruai a, April 22, 2025 a firfiak pawl ten Pahalgam, Anantnag District, Jammu & Kashmir hmuna mi 26 thah te sunna hun urhsun taka hman a nih bakah Pu Albert Lalthlamuana, Chairman, Higher Education Cell chuan April 21-23, 2025 chhunga Pu Lal Thanzara, President MPCC hova Mamit District chhung khaw hrang hrang an tlawhna Report a pe bawk a ni.
