Aizawl, 28th August, 2023: Vawiin khan ZPM chuan party office-ah chhung inkhawm kan hmang a, he huna thusawitu PL Liandinga, Consultant chuan, “Kan ram hruaituten an hnuaia eirukna an tihreh theih loh chhan chu anmahni an fihlim loh vang a ni ang tih hi ka ring a, ZPM MLA Candidate-ten “Ka eiru ve lovang” an tih hian ka thla a timuang em em em a ni,” a ti.
PL Liandinga chuan, “April 20, 2023-a bial viltu an puanah ka tel ve a, April 23, 2023-ah damdawiin ka lut a, vawiin thlengin dam fel hlei thei lovin ka la awm a ni. Thenkhat phei chuan ZPM atanga bang tawhtein min sawi a, ka bang lo a ni tih lantir nan hrim hrim pawh vawiinah party headquarters-a thusawina hun ka chang thei hi ka lawm takzet a ni. Mahni in lum atangin kan party candidate-te thusawi ka lo thlir ve thin a, ZPM-ah hian ka tel ve pawh a ngai ta lo a nih hi tih mai turin ka aia tha hlir, ka aia viak tha leh hrisel, ka aia thil hria leh sawithiamte an nih avangin awmhmunah ka lung a lo awi hliah hliah mai a ni. An thusawi ropui ka tih em em chu, “Kan eiru ve lovang” tih hi a ni. Hman ata tawh kan ram hmasawnna daltu chu eirukna hi a ni a, eiruk loh ringawt pawh hian hmasawnna chu amahin a lokal mai a ni. Mahni hnuaia mite eiru khap ngam lo khawp ni tur chuan dawihzep ngai deuh a ni. Kan ram hruaituten an hnuaia eirukna an tihreh theih loh chhan chu anmahni an fihlim loh vang a ni ang tih hi ka ring tlat a ni. Ka rin hi a dika ka rin chhan pawh, ka hmuh miah loh Pathian pawh ka ring tlat a, benga ka hriat leh ka hmuhte phei chu rin sual ngaihna a awm lo a ni. Kan ram thanmawhbawk No.1 chu eirukna a ni a, No.2 pawh eirukna, No.3 pawh eirukna tho a ni,” a ti.
ZPM Party Consultant chuan, “Eirukna hi retheihna avangin a awm lova, rilru zawk a ni. ZPM-a inziaklut tam tak, helai hmuna lokal khawm leh tlang hrang hranga ZPM-a phur em emte hian Contract ka chang ve ang a, ka hlep teuh ang tih lam rilru an pu lova, kan ram hi dingchhuak se, Mizoram hi changkang ve ila tih ringawt an ngaihtuah a, chumi avang chuan hnukulh dawnin ZPM sawrkar hun an nghak a ni. Chutihlaia kan MLA Candidate-ten ‘Ka eiru lovang’ an tih chuan Mizoram hi kan khaichhuah ka ring nghet tlat a. Kan sawrkar kal tawhten hetiang hian an ti ve ngam reng reng reng lo. Kan MLA-te berin an eiruk loh phawt chuan midang tan eiruk ngam a har khawp ang. Hlemhletna hian kan nunah hmun thuk tak a luah tawh a, mahse ZPM kan sawrkar chuan kalphung thar hnuaiah thlai thar kan lei emaw, Sawhthing kan lei a nih pawhin thil a nih tur angin a lo thleng mai dawn a ni. Tuna kan sawrkarah pawh hian eirukna laka fihlim em em, MLA leh Minister ka hmu a, mahse an che thei lo. Sports lam na takin an nawr dawn emaw tih laiin Phullem phahah an tawp leh ringawt a, kan population ngaihtuahin India rama phul lem ngah ber kan ni ringawt. Kan han sawrkar ang a, khawiah nge kalphung thar chu ti a inzawh inzawh a ngai lovang. Kamrul-a tel lova sawrkar kalpui ringawt pawh kalphung thar a ni tawh dawn a, hetiang lova kan kal hian kalphung thar chu a ni mai,” a ti bawk.
ZPM Party chhung inkhawm hi Pu Kapthangvung, Adviser chuan a kaihruai a, Rev.Ngurchhuana, Salem Veng chuan hunserh hmangin Robinson-a, Palak bial Candidate pawhin thusawina hun a hmang bawk a ni. Kar liam ta (August 21-27, 2023) chhung khan Mizoram hmun hrang hrang atangin ZPM zawm thar 2014 an awm bawk a ni.
