ZPM Party hruaitute ruihhlo leh a kaihnawihah fihlim dawn

Aizawl 17 May, 2022 : ZPM General Headquarters Executive Committee chuan an party hruaitutura dinhmun pawimawh chelhtute leh MLA candidate tur te chu ruihtheih thilin a tih buai loh an ni ngei tur a ni, tih resolution an siam hi tha kan ti a, ZPM hruaitute chuan zawm ngei nise an ti.
Vawiina ZPM General Headquarters Executive Committee chu Dawrpui Multipurpose Centre-ah neih a ni a, he hun hi Pu Lalliansawta, President-in a kaihruai a, party constitution thar, ruahmanna lo awm tawh chu siam that ngaite siam that a nih hnuin pawm a ni a, hemi rual hian kum 2023 General Election lo awm tur atan ZPM Policy pawm a ni bawk.
ZPM Executive Meeting vawikhatna chuan a hnuaia mi ang hian resolution a siam –
ZPM General Headquarters Executive Meeting May 17, 2022 – a Dawrpui Multipurpose Centre-a neih chuan ZPM constitution siam that chu lungrual takin a pawm. ZPM party inrelbawl dan hi party dangte tih ve ngam loh, kan ramin a mamawh, hruaitu lawk bik awm lo va thawhhona/a huho a rorelna (collective leadership) a ni. A hnuaia tarlan ang hian ZPM General Headquarters Executive Meeting chuan hetiang hian resolution siamin, Zoram mipui hnenah ngenna an siam.
1. Val Upa Council-in kum 2023 MLA General Election lo awm turah ZPM Chief Ministerial Candidate atan Pu Lalduhoma min puan sak hi a lawmawm kan ti a, ‘Kalphung Thar, Mipui Sawrkar’ din a nih ngei theihna turin Zoram mipui thlawpna kan ngen. Zoram mipui ten India ram state thenkhat CM kan awh em em ang nei thei turin ZPM chu a inbuatsaih mek a, ‘Kalphung Thar, Mipui Sawrkar’ siam turin Zoram mipui zawng zawng thinlung takin kan sawm e.
2. April ni 28, 2022-a ZPM Val Upa Council thukhawmin Kalphung Thar champion pui tum kan nih angin, hruaitute chu nungchangah duhtui a tul hlein kan hria a, chuvangin party-a dinhmun pawimawh chelhtute leh MLA candidate tur te chu ruihtheih thilin a tih buai loh an ni ngei tur a ni, tih resolution an siam hi tha kan ti a, ZPM hruaitute chuan zawm ngei nise kan ti.
3. Union Territory (UT) kan nih atangin kum 50 zet a lo liam ve ta reng mai a. Kan ram rorelna in sang ber pawhin kum 50-na (Golden Jubillee) hmanni lawkah a lawm zo chiah a ni. He hun chhung hian PC party in term khat leh a chanve min hruai a, hei bakah hian President Rule-ah kan awm leh zeuh tih loh chu Congress leh MNF sawrkarna hnuaiah kan awm ta char char a ni. Hetiang hi a nih avangin kan ko thlak a hun ve ta nia Zoram mipui ngaihdan hi kan tawmpui a. Zoram mipuite beiseina tihlawhtling a, kum 2023-a sawrkarna siam ngei turin ZPM chuan theihtawp kan chhuah dawn a ni.
4. Tun tum MNF sawrkarna hnuaia kan ram dinhmun thlirin, kawng engkimah a lungawithlak loh kan ti a. Hmasawnna hnathawh hrang hrang thuanawp chhan leh ram inrelbawlna harsatna chhanah MNF sawrkar hian hrileng chuanlam mahse, hei hi chuanlam tlingah ZPM chuan kan ngai lova. Hrileng avang hian sawrkar hian – mimal, tlawmngai pawl, Kohhran leh central sawrkar atangin puihna tha leh sum tam tak a hmu a. Ram hmasawnna hnathawh leh ram mipui inrelbawlna kawngah chhuanlam tling tur khawpin hrileng khan harsatna a thlen lovah ZPM chuan kan ngai.
5. Zoram mipui ten beiseina sang tak ZPM-ah an nghah ang ngeiin, khawvar eng mawi tak hmuh tir hi kan tum ber a ni a. ZPM Policy leh Programme tihhlawhtlin a nih ngei theihna turin Zoram mipui thlawpna kan ngen takzet a ni.