Vawiin February ni 15, 2024 hian Zoram People’s Movement, General Assembly Vawi – 1 na chu Baptist Centre, Falkland, Aizawl-ah neih a ni a. He hunah hian kum 2024-27 chhunga hruaitu thar thlanna neiin, hruaitu thar atan heng mite hi thlan an ni –
President – Lalliansawta
Vice President – W. Chhuanawma, MLA
Treasurer – Lalchhuanthanga, MLA
te an ni a. Mizoram hmun hrang hrang atangin palai 4,500 bawr vel an kalkhawm a. Mizoram College Teachers Association (MCTA) te kaihhruaina hnuaiah inthlanna thianghlim leh felfai tak neih a ni.
Lalduhoma, CM chuan thu sawiin, “Hmun hrang hrang atangin kan inthlang hi min thlir a, mi thahnem takin min ṭawngṭaipui tih kan hria a, kan lawm hle a ni. He inthlanah hian chuhtu kan awm ve ta nual a, thil kalphung pangngai niin, keini tan chuan hmasawnna nasa tak a ni. Vawiina kan hruaitu thlan chhuah ang ang hi kan pawl hruai tura Pathian hriak thihah kan pawm tur a ni a, hruaitu thar kan thlan chhuahte pawhin tha taka party hruai turin kan inchah duh a ni,” a ti.
He hun hi Lalliansawta, President chuan a kaihruai a, Rev. Dr. K. Thanzauva, Vice President chuan hunserh a hmang a. Lalduhoma, Chief Minister bakah Minister te, MLA leh Corporator leh Councillor te an tel kim hle a ni.
