Vawiin Zirtawpni khan ZPM chuan Party Office-ah Political Session hun hmangin thusawitu Pu R.Lalthansanga, PAC chuan, “MNF leh Congress-te sawrkar ang siam kan tum lova, kan ram an kaihhruai dana mi beidawngte tan beiseina thar siamsak turin ZPM chuan vote hmanga ram chhanchhuak turin mipui kan sawm a ni,” a ti.
Pu R.Lalthansanga chuan, “Mipui sawrkar siam kan tumna kawngah hian ramhluiah kan la inthlang dawn a, hmabak hautak tak kan la hmachhawn dawn a ni. Kan khingpui turte hian policy mumal an nei ve dawn lova, sum hmachhuanin an rawn che ngei ang. Rs.25,000 chauh pawh beiseia nghak fan fan duh tam tak an awm a, hetiang hi nimahse sum leh therhlo sem avanga mipuiten kan duhthlan leh tha kan tih zawng lantir ngam tura mipui kan zirtir leh fuih a ngai. ZPM hi pawl hrang hrang kalkhawmin a siam a ni a, party dang tawnhriat nei tha tak takte inrelbawlna kawngah kan tluk kher lo ang. Mahse mi tha tak tak kan ngah em avangin bial vil chungchangah pawh chang lo engemawzat an awm a, a then phei chuan min chhuahsan hial a, mahse heng mite hi kan dem lo. Kan duh ber chu kan ram siamthat hnathawh a ni a, ram mipuiin min beisei mekna hi tih hlawhtlin ngei kan tum dawn a ni,” a ti.
Pu R.Lalthansanga chuan, “ZPM kaihruaitute hi mihring ve bawk an nih avangin chet phelh deuh leh tihfuh tawk lo awm thei a ni. Kan mamawh ber chu thawhhona tha leh inpekna a ni a, kan inlungrualna hian kan tum ram min thlenpui dawn a ni. Block leh Unit hrang hranga kan hruaitute hi kan tan an pawimawhin ZPM ban pawimawh an ni a, an zai ngai chungin campaign chungchangah pawh hma kan lak thiam a ngai a ni. Khawvela mi hlauhawm ber chu mi beidawngte an ni a, beidawn chuan tih hreh an nei tawh lo. Kan Mizo thalaite hi tun dinhmunah an beidawng nasa tawh em em a, hetiang renga kan kal chuan kan ram dinhmun tur hi hriatthiam a har tawh hle a. Chuvangin kan hmabak thim tak hi ZPM hmanga siamthat a, vote hmanga ram kan chhanchhuah a ngai a ni,” a ti bawk.
Thusawitu dang ZPM Thalai Headquarters President Dr. Lalrammawia chuan, “’Bial tinah hma kan sawn, mipui an inhawng’ a ti a. “SEDP hmangin MNF-in mipui an huikhawm a, mahse an thinglung an lei tel loh avangin chung mite chuan inthlan hmain ZPM an rawn pan khawm leh vek dawn a ni. Tun hnaiah chanchin duhawm lo tak kan ram rorelna khawl inpuiah a thleng a, Assembly Secretariat staff lak dan buangbar leh fel lo zet hian kan thalaite rilru a tihnual hle a, an tih dik loh hi sawrkar hian siamthain cancel ngei se kan ti a ni,” a ti ve bawk.
Vawiina ZPM Political Session hi Pu C.Rohnuna, Secretary chuan a kaihruai a, Pu BC Tawna, General Secretary (Organisation, Mamit), TBC Lalpekthara, Champhai North Block Joint Secretary leh midangte pawhin thusawina hun an hmang bawk.
