Sinlung Hills Council General Election Campaign a feh chhuak mek ZPM Party Vice President Pu C.Lalnunema chuan New Vervek tlangdung a fanna ah ZPM Party thil tumte chu Pathian duhzawng a nih thu a sawi.
Pu C.Lalnunnema ZPM Vice Preseident chuan, “Kan ram siam tha turin politics huanga in hmang ngai lote pawh Pathian rawngbawlna a ni tih hriain dai ngai loh ram kan dai chho ta zel a, ZPM Party thil tumte hi Pathian duhzawng a nih avangin Pathianin Mipuite kaltlangin Sorkarna min pe ta a ni. Kan ram rorelnaa Pathian ram tundin hi kan thupui a ni a, mifel ber leh tling ber te ni lo mah ila Pathianin min hruai zel a, kan ram siamthat hna harsa tak takte pawh a hlawhtlinna min hmuh tir zel a ni,” a ti.
Pu Nemtea chuan,”Kan hma lawkah Hmar tlangdung hruaitu thlanna hun kan hmang leh dawn a ni a, he hunah hian mipuiten ngaihtuahna fim tak kan sen a tul a, sum leh pai therhlo vang mai mai a kan duhthlanna hmangsual lo turin mipuite ka chah a ni,” a ti. “ZPM te hian nasa takin beih leh sawiselna kan tawng nasa hle a, eptu party lamte chuan ‘an insawi anga awm lo’ tiin min bei mek a ni, nimahsela kan policy tam tak kan ti hlawhtling chho mek a, kan Minister leh MLA ten rim takin hna an thawk mek a ni, party thenkhatten thu tlinglo hmangin min bei mah se Pathian leh mipuite kan lamah an tang tlat a, hei hi kan chakna leh kan thla timuang thintu a ni,” a ti.
Vice President chuan,”Hmar tlangdung mipuite nunphung leh ZPM Policy hi a inmil hle a, Hand Holding Policy hi kan rama kut hnathawktute khaichhuahna tur a ni a. Hmar tlangdung mipuite hi kut hnathawh kawnga taima tak leh tlangdung intodelh tak in ni a, chuvangin kan policy Bana Kaih Hand Holding Scheme hi in dinchhuahpui ngei ka beisei a, Sem policy in mipui rilru lo hruai khawlo tawh mah se Bana Kaih policy hmang hian kan ram chhanchhuah hna kan thawk mek a ni. Sinlung Hills Council General Election lo awm turah pawh hian mipuiten ZPM Party leh HPC tang dun ten candidate duhawm tak tak kan rawn chhawpchhuah sak che u hi, lungsi taka lo vote tling theuh turin mipuite kan ngenin kan sawm che u a ni,” a ti.
