Vawiin August ni 1, 2025 hian Mizo National Front chuan Mizo Hnamrunah Chhung Inkhawm hmangin, hun hnihna Political Session-ah thu sawiin Zodinpuia, General Secretary chuan, “ZPM sawrkarin kumkhat leh a chanve chhung lekin Reserve Bank of India (RBI) leh hmundang atangin cheng vaibelchhe 6424 leh nuai 74 a puk hman tawh a, thla tin nuai 35693 puk reng ang a ni,” a ti.
Zodinpuia chuan, “ZPM in sawrkarna an chan atangin Mizoram chu a hnungtawlh zawng hlirin a kal a, sum puk leh ramchhung mipuite atanga chhiah lak bak; hmundang atanga Mizoram hmasawnna tur dapchhuah ngaihna a hre lo. Kum 2023 December ni 8 a ZPM sawrkar lakluh a nih atangin RBI ah cheng vbc. 4233.49 a puk tawh a, hmundang (NABARD,EAP,SASCI,NDCDC) atangin cheng vbc.2191.25 zet an puk tawh bawk. Kumkhat leh a chanve chhung lek a ZPM sawrkar sum puk hi cheng vbc. 6424 leh nuai 74 a tling tawh. Thla tin nuai 35693 puk reng ang a ni. Heti chung hian sawrkar hmasain a tihduh loh mipui fairelbel rawk zawngin chhiah tam tak an la a. Buhfai man an tipung a, petrol leh diesel man an tisang a. Tuialhthei atanga chhiah an lak ringawt pawh nuai 5109 zet a chuang tawh. Hengte hi mipui sum a ni a, sawrkar hian a hmanna diktak mipui min hrilh turin kan phut a ni,” a ti.
MNF General Secretary Zodinpuia chuan, “Sawrkarin peace city project a buaipuina ah thuzep ruk lian tak a nei niin a sawi a, Chief Minister Pu Lalduhoma hian sorkar laipui-a sum dil nan Mizoram state capital Aizawl chu sawn turin ngenna a lo thlen reng a, hei hi vawiin thengin Mizoram mipui hmaah a zep tlat a ni. Kumin 2025, April ni 24 khan Seema Rani, section officer (AMRUT-IIB), MoHUA, New Delhi chuan Chief Secretary leh Resident Commissioner, Mizoram hnenah, “shifting of State Capital from Aizawl to Thenzawl, Mizoram” tiin DPR siamna tur chungchang lehkha a thawn a. Hei bakah hian sawrkar lehkha kan hmuh theih hrang hrangah Mizoram state capital Aizawl sawnna tur thu hi a chuang a ni. Hemi chungchang ah hian Chief Minister-chuan Aizawl khawpui tawt lutuk tihziaawmna tura ‘peace city’ din tum a nih thu bak hi mipui ah puanzar a la nei lo a, Mizoram leh Aizawl mipui rawn na neilo a; Mizoram state capital Aizawl a ruk a sawn tumna lo awm reng hi sawifiah ngei turin Chief Minister ka ngen a ni,” a ti bawk.
Zodinpuia chuan, kawngchhia avanga Mizoram harsatna tawh chungchang ah mawhphurtu diktak chu Chief Minister, Finance Department changtu leh PWD Minister an ni, a ti a. State dang a thil thleng nise chu mipuiin a mawhphurtute hi bang turin an nawr nasa tawh hle ang. Thal hun chhung zawng Mizoram sawrkar enkawlna hnuaiah NH 06 (Kawnpui – Khamrang) a awm a, Furpui intan tawh hnu July ni 7 ah NHIDCL kutah Mizoram sawrkarin a hlan ve chauh a ni. Kawngchhia avanga nitin a inhlawhfa miharsa zawkten hnathawh tur an neilo rei tawh a, an dinhmun hi ngaihtuah a ngaitawh hle. Covid-19 hripui lenlai a MNF sawrkarin mipui hnena buhfai a thlawn a a sem ang khan LESDE Department hnuaia Labour cess tlingkhawm atangin kuthnathawk miharsa zawkte tanpuina pe turin sawrkar ka ngen a ni, a ti bawk.
“ZPM sawrkar chu inthlan hma a an thusawi leh intiamna te bawhchhiat an pawi tilo hle niin MNF General Secretary chuan a sawi a, mipui ah chhiah tam tak an lak laiin ZPM Minister leh MLA te chu an hamthatna turin nasa takin an in vur a, sawrkar hmasa hunlai a motor leina tur nuai 4 dah pawh nuai 15 ah tisangin, hemi avanga sawrkarin kumkhat a sum a sen belh chu nuai 440 a ni. Hei bakah hian MLA te insakna nuai 20 pek thin pawh nuai 30 ah an tisang a, hei bakah hian an in thuam thatna tur (house furnishing) leh thildang a hamthatna an inpekbelh hi a tam hle a. ZPM sawrkar hnua Chief Minister, Minister leh MLA ten an hamthatna tur an siambelh hi nuai 2480 zet a ni. Heti chung hian mipuite chu a rawk theihna a piangah min rawk a, ram rorelna a enchhin sawrkar neih pawi zia mipuiten kan hre dawn chauh a ni,” a ti.
Chhung Inkhawm hi Rochungnunga, President MNA, MNF GHQ-in a kaihruai a, Pu Herbert Ramengmawia, Jt. Secretary, MNF in Hunserh hmangin, Lalnunmawia Pautu, Vice President, MNYF hnen atangin Kawnpui to Khamrang Kawngchhia an tlawh chanchin ngaihnawm tak ngaihthlak a ni. Zaithiam Eli Khawlhring-in thiam taka zaiin inkhawma kal te a awi bawk.
