Vawiin khan Bilkhawthlir VC North Conference Hall-ah ZPM Serlui South Block ten political training an nei a, TBC Lalvenchhunga, PAC member chuan resource person niin hun a hmanpui a ni.
TBC Lalvenchhunga chuan thusawiin, “Nimin maia kan Assembly House-a an pass tak, The Mizoram Land Revenue (Amendment) Bill, 2022, an siam that kha a hmangtu tur mipuite rãwnna (public consultation) nei miah loin House-ah put luh a ni a. A bikin clause belh 75(A) Share of Government on Acquisition of Land tih kha chhiah (Tax) ni si lo, chhiah chunga chhiah (cess) ni bawk si lo a ni a. Notified a nih hma ngei hian mipuiin kan ngaihtuah a ngai a ni. Mipuiten kan ram man (compensation) kan dawn ve atanga sawrkarin sum chanpual neih ve a tumna dan a ni ber a. A hmain 15% MNF sawrkar hian a lo lak sak tawh a, amaherawhchu, court-ah khin niin, dan lamah a chak lova, pe let leh vek tura tih a ni a, tunah hian mipui hnen atanga laksak ngei tumin dan a siamchawp ta tihna a ni,” a ti.
ZPM PAC Member chuan, “Tunlaiin kan ramah a bikin kan ram hruaitu lu ber thlengin ram kan hruai danah duh khawp loh kan ngah ta hle niin a lang a. Kan hruaitute thusawi pawh nuihzat chânin kan châng tawh a, politics kan khelh danah pawh thudik hrulah kan khel ta mai mai em aw a tih theih ta hial mai. Keini party pawh mimal leh pawl angin beihna kan tawk ta malh malh a, dawt hmang te pawhin min bei nasa tawh hle a ni. Sawrkar tha siam tumin theihtawpin hma kan la ve a, kan ramah diknain ro a rel a, hma kan sawn ve theihna tûrin nasa takin kan bei ve a ni. Party a thil pawimawh tak pakhat chu thawhhona tha a ni. Kan party hi kan thawhhona a thain kan inlungrual em em a, dikna, rinawmna leh huaisenna nen hmalam kan pan zel dawn a. Kan tum ram, kan ram leh hnam siam that hi kan la tihhlawhtlin ngei kan ring a ni. Dâwt pawisa lo hotu hnung zuitu chuan thu tak a ngaihuaa, a hmelmak ṭhin. Dâwt a hamthatna chan pawisa lotu chuan malsawmnaah a ruat zawk ṭhin,” a ti bawk.
Nl. Baryl Vanneihsangi, AMC Councillor pawhin thusawiin, “ZPM in a kan au pui ber chu system tha a ni a, kan tumah kan chian a ngai a, mimala hmalak theih a ni lo va, lungrual taka kan thawh chuan kan tum ram kan thleng thei dawn a ni. Pathian leh kan ram tana hmanraw hmantlak a kan inchher chhoh a ngai a, Pathian hruai theih leh hruaitlak a kan awm a ngai a ni,” a ti.
