Vawiin hian MNF Party chuan an party office Mizo Hnam Runah chhung inkhawm an nei a. He inkhawmah hian TC Pachhunga ex MLA, Adviser MNF chuan thusawiin, “ZPM sorkar hi a bilhah a tho lo nasa em em a, an insawi ang an ni lo a, mipui beisei an pha lo nasa em em a ni,” a ti.
TC Pachhunga chuan, “Chief Minister Pu Lalduhoma’n raltlan chungchangah Central sorkar a thil phal thu a sawi a. Chutih laiin RTI chhannaa a lan danin central-in raltlan chhawmdawlna cheng khat mah min la pe lo. MNF sorkar khan zahawm takin kan unau raltlante kha a tuamhlawm a ni,” a ti a. “Thla 5 chhung an sorkar tawh chhung hian tlatluma an insawina Central sorkar aṭang hian chemg khat pawh an rawn sawi chhuah sawi tur a la awm lo,” a ti bawk.
MNF Adviser chuan, “Sum enkawl thiam loah MNF min puhtute khN vaibelchhe tam tak sum puk tawh a, SASCI sum ṭhahnem tak an ti lapse bawk. Vaibelchhe 110 thlai thar lei nan an dah thu Larsap-in a sawi a. Pakhatmah finalcial year hluiah khan an lei lo a ni,” a ti bawk.
“Kuhva ro tawlhruk pawh Home Minister Pu K Sangdanga’n, thla khat chhungin kan titawp ang, a tia. An titawp lo nasa em em a, High Court aṭangin insawifiah turin an ti ta hial zawk a ni,” a ti a. “Inremchenna kalpui tura insawi siin MLA hamṭhatna hrang hrang nasa takin an tipung a. CM Adviser 5 an neihte senso te hi a tam uchuak em em a ni. Nuam an tawl a ni ringawt mai a ni,” a ti bawk.
“Contract hna contractor ngeiin an thawk tawh ang, tia an sawi te chu mumang mai a chang zo ta a. ZPM mi leh sain hlir work supervisor an inruat a, contract hna an thawk mup mup mai a ni. Tin, Lei man nasa takin an tipung bawk a ni,” a ti a. “Police te nasa takin an tawng a, hrechiang mah lovin an suspend a, thiam an chang leh si a. Police-in an vote an ring lo nge Election-a Police duty 1000 chuangin vote an thlak thei ta lo a ni,” a ti bawk.
