Vawiin July ni 28, 2025 (Thawhtanni) hian MNF party chuan an office Mizo Hnam Runah chhung inkhawm an nei a. Hun hnihna a thusawitu MNF Senior Vice President, Dr.R.Lalthangliana chuan, “ZPM sorkar hi Finance enkawl kawngah a hlawhchham chiang hle a ni a ni,” a ti.
Dr.R.Lalthangliana chuan, Pu Lalrintluanga Sailo MLA, hman ni lawka kan sun tak chanchin sawiin, MNF NCC ni lai, MNF term kal ta a Dy. Goverment Chief Whip, a boral ni thlenga Deputy Leader, MNF Legislature party a ni a. Naupangte anih lai atanga Mizoram zalenna sualtute zinga mi, a boral ni thlenga Mizo Nationalism nunpuitu leh midangte tana thil phal em em a ni. Min awm loh san ta mai kha MNF tan channa nasa tak a niin, MNF chuan kan ui takzet a ni a ti.
Dr.R.Lalthangliana chuan Mizoram GST dinhmun a sawi a. “Hei hi keima sawi mai ni lovin hman ni lawka Union Finance Minister pawhin a sawi a ni. GST hniam reng reng chu Finance Commission atangin sum an dawng tha thei ngai lo. Kan hun lai khan GST lakluh a pung nasa a, tuna GST tlahniam ta em em hi restricted tender leh departmental-a contract hna inpek a nasat vang pawh a ni thei. Kum 2017-18, GST dan hmanga chhiah lak anih tanga a vawi khat nan kum 2024-25 ah Mizoram GST lakkhawm a tlahniam duai a, Covid hunlai pawha la thleng ngai lo a ni.
“Kum tharah pawh ziaawm lam aiin a hniam zawngin kan kal chhunzawm zel. Tual chhungah pawisa a vang a, sumdawngten inhralh harsa an ti deuh vek. A chhan ni ta ber chu budget figure atanga enin ZPM sorkar hi Finance enkawlah a hlawhchham chiang hle a ni. Sorkarin kum 2024-2025 chhung kha inrenchem kumah puang mahse; Mizoramin leiba cheng vaibelchhe 3133.45/- a neih belh niin Comptroller and Auditor General of India (CAG) report-ah tarlan a ni. Covid kan tawrh nasat ber kum pawh khan cheng vbc.1800 chauh kan puk a, kumin hi sorkarin sum a puk tam ber kum a ní. A sum fai pawhin a tam a, GSDP percent atanga chhut pawhin Mizoram leiba san ber kum a ni,” a ti.
Good Governance chungchang sawiin, sorkar tha leh rintlak chu hun harsa a lo thlen changa huaisen taka mawhphurhna la ngam, mi dangte puhmawh leh dem mai mai ching mi a ni tur a ni lo a ti a. MNF term thum chung khan hmalakna lian tham tak tak an lo thawh tawh thenkhat a sawi a. Kum 1999-2000 bawr vêl khan Government of India (Rural Development Ministry) in Rural Connecvity (tuna PMGSY) ni ta sum hmang hian Thingtlang kilkhawr ber mihring 250 awmna khua inkalpawh nan bul kan lo tan tawh a ni.
India ram-a State leh UT zingah sum ruahmanna Crores 600 zêt thehlut hmasa ber kan ni a. MNF sorkar term hnih chhung khan tuna World Bank Road : Aizawl – Thenzawl – Lunglei Road hi kan peih hman a. Aizawl Bawngkawn atanga Durtlang kawng motor lian inpelh theihna tura siamtu kan ni. Multi-Modal Transit kawng zau tak siam chhuaktu kan ni bawk.
Aizawl-Seling- Serchhip – Hnahthial – Lunglei – Lawngtlai leh a piah lam thlengin Double Lane kan neih mêkte hi MNF siam a ni bawk. Aizawl – Saitual – Khawzawl to Champhai tuna double lane hi MNF sorkar kutchhuak a ni. Aizawl to Mamit, Kawrthah to Zâwlnuam, Kanhmun lam pawh MNF sorkar hmalakna a ni. Aizawl to Sesawng – Darlawn – Sakawrdai – E Phaileng – to Suangpuilawnte pawh MNF hmalakna vek anih thu a sawi.
Mizorama sorkar building tha leh ropui zawng zawng hi MNF kutchhuak deuh vek niin, development lian tham zawng zawng hi MNF kutchhuak deuh vek a ni a ti. Good Governance chuan sorkar hmasa thil tih that chu a chhunzawm mai tur a ni tiin, MNF chu a tak taka hnathawktu kan ni a, thil tha chu sorkar hmasa hmalakna pawh kan chhunzawm zel a ni, a ti bawk.
