Vawiin January ni 27, 2025 (Thawhtanni) hian MNF party chuan Mizo Hnam Runah chhung inkhawm an nei a. Hun hnihnaah MNF Treasurer, Pu Lalruatkima chuan VC leh LC-te term ding lai ZPM sorkarin thla 6 chuang zetin a pawt tawi a, dan kalha a hun hmaa inthlanna a buatsaih lui tur hi mipui rorelna (Democracy) kalphung zah lohna leh pawngsualna nasa tak a tlin thu a sawi.
“Cabinet Minister Pi Lalrinpuii chuan ni 10.06.2024 khan LC leh VC-te zingah an mi leh sa ni lote chu sorkar thawhpui ṭha duh lovah puhin an term pawhtawi sak a nih tur thu a lo sawi tawh a. Cabinet Minister Pu K. Sapdanga pawhin ni 19.10.2024 khan Mualvum IR Police ho hmaah, Party dang VC an la tam avangin hmasawnna hnathawh a harsa tih leh, a rang thei anga inthlanna buatsaih tum a nih thu a sawi leh bawk. VC leh LC ding laite hian sorkarin mipui tana thawk tura a tih an tih duh loh sawi tur pakhat mah an hriat loh laiin, hmasawnna hna thawhpui atana a ding laite an thawhpui duh loh vang a ni a. Ngaihdan inang lote inpawm tawn thiamna hi democracy chakna leh ropuina a nih laiin ZPM sorkarin ‘Party Bil Sorkar’ din a tumna langsar tak hi an hlawhtlinpui lohna turin kan vote hlu tak hmangin i dodal ngam ang u,” Pu Lalruatkima chuan a ti.
Pu Lalruatkima chuan, “ZPM sorkarin mipui sorkar ni lo, party sorkar sawhngheh an tum ngawr ngawr avang hian inthlan hun pangngai pawh nghak thleng ngam lovin, tun tuma VC/LC inthlanna neih tur hi hnawhsarum takin a puang a. VC/LC Election-ah Education department hnuaia zirtirtute chu a buai ber tur an ni a. ZPM sorkarin mipuite inthlanna an kal luih pui hun hi HSLC exam lai leh HSSLC exam ṭan dawn ṭep a ni a, Inthlan nan zirna In tam tak hman a ni dawn bawk a. Zirtirtuten zirtir hna an thawhna tibuai zawng leh zirlaite tana boruak dang siam hun loh lai taka VC/LC inthlanna buatsaih luih a ni tur hi ZPM sorkarin zirlaite leh zirtirtute a ngaih thahzia tichiangtu a ni a. Sorkar thuneihna hman sualna pawi tak, zirlaite tawrhna thleng tur pawh pawisak lohna a nih avangin, VC/LC inthlanna neih turah hian mipuiten zirlaite thlavang hauhna lantir nan, MNF Candidate-te hnehna min chantir a ngai a ni,” a ti.
Pu Lalruatkima chuan ration buhfai a let a tih to chu MNF sorkar hunah ennawn a ni dawn tih sawiin, ration buhfai khulhna man ZPM sorkarin a leta a tisang thut mai hi mipuite dinhmun zir chiang hmasa si lova sorkarin a thuneihna a hman khumna lungchhiatthlak tak a ni. Mipui nawlpui, thla bi hlawh nei ve lo leh khawsak harsa zawkte tawrhna nasa tak a thleng mek hi a vanduaithlak a. Buhfai supplier thlan danah a chhang hniam zawk thlang lova, sang taka chhangtu thlan a nih dan te, buhfai Grade A’ supply tur anga sawi a nih laia tun thlenga buhfai ngai reng sem chhunzawm a nih dan te, a tira sawi rik awm miah lo, ruling party-te induhsakna remchang tak ‘Card Sen’ siam belh hnuhnawh leh a nih dante en hian ZPM sorkarin zirchianna mumal nei hmasa lova mipui tawrhna a thlen tih a sawi a. Pathian leh mipui zara MNF sorkar hunah ennawn leh anih tur thu a sawi bawk.
Pu Ruatkima chuan, “ZPM sorkar chu chhungkua in awmtha duhlo/Drug Addict kawl ang mai an ni tih sawiin, “Kan ram hruaitu hmasaten mipui mamawhna hria a, theihtawp chhuaha rohlu an lo siam leh an enkawl Lengpui Airport pawh NGOCC-te meuh pawhin an dodalna karah India Sipai, IAF hnena hralh an tum mek a. An chhuanlam sum senso a hautak tih hi sorkar kal ta zawng zawng khan an chinfel theih laiin; kum khat chuang awrh an sorkar a, an enkawl thei lo hi a mak ani. Lengpui Airport hi IAF hnena an hralh anih chuan strategic location-ah hman ani mai dawn a, mipui tan a him lo a ni. ZMC leh hydel project thlengin hralh an tum ta zel mai hi pa zawmthaw tak, chhungkaw bungraw hralh tur dap ching, chhungkuain awmtha duhlo/ drug addict kan kawl ang mai hian hralh tur an zawng ta zel mai ani,” a ti.
ZPM sorkarah hian Mizo hnam hlutna leh himna ngaihthaha rahbehin a awm ta mek a. Hetianga Mizo hnam himna ngaihthah zui vek tur VC/LC kan neih hi a him lo hle dawn a. Chuvangin, Mizo nationalism himna a tan ramri-ah a ni emaw, Mizoram chhung leh pawnah a ni emaw, huai taka ding tlat thin MNF VC/LC kan neih hi a pawimawh tak zet a ni tih MNF Treasurer chuan a sawi.
ZPM sorkar hnuaiah hmasawnna hnathawh a chawl thup a, hmasawnna ruhrel thar din hmuh tur a awm lo a, sorkar hnathawkte hlawh pek tur pawh thla tin puk chawp zel ngai leh sum tam tak puk belha mipui phurrit siam belh zawng zela hma an lak avangin tual chhungah sum leng vak a tlem em em a, nitin dap chawpa khawsate chu dinhmun khirhkhan takah min hnuk lut mek a ni. Hetiang karah hian state sorkar lakah beisei tur a awm lo a, VC-te hnathawhna ber hi Central sorkar hnuaia Finance Commission & State Finance Commission sum ruahmansak leh Central Scheme awm sate a ni. Chutiang bawkin Local Council-te pawh The Mizoram Municipalities Act,2007 hnuaia AMC enkawl an ni a, State sorkar atangin hmasawnna hnathawhna tur dawnthleng a awm tawh lo, AMC hnuai a mite an ni, a ti bawk.
Hetianga Central sorkarin State sorkar kaltlanga LC/VC-te sum a pek ṭhin hi hun tiam chhunga (a tlangpuiin ni 15) State sorkarin a pek chhuah loh chuan a interest nen a pe chhuak ang tih hial a ni. Chuvangin VC/LC-te sum hmuh thuah ruling leh opposition an danglam lova, sum hrêk sak phei chu India Dânpui kalh a ni. Kan veng leh khaw tana Central sum lokal, a huna kan hmuh theihna tura huai taka hma la ngam ngei tur MNF LC/VC kan neih ngei a ngai. Zoram mipuiin Mauruangi emaw kan zawn dawn kan tih laiin Bingtaii zawk kan zawn mek tih kan hre chho zel a. Enchhin sorkarah hian Zoram mipui mangang in kan rum a, inchhirna in kan khat mek a ni. VC/LC inthlanna, Dt.12.02.2025-a neih turah hian Pathian leh mipuite zarah MNF Party in hnehna kan chang a nih chuan ram leh khawtlang tana thil tha leh hmasawnna tur apiangah phur tak leh tha tho taka State sorkar leh Central sorkar hotute thawhpui zel MNF Party chuan kan tum a, enchhin sorkar mipui beisei pha silo tan pawh inenletna hun tha, insiamthatna hun anih hlauh theih nan, mipuiin sorkar muthlu ben harh nan i vote lo ngam ang u. sorkar hnathawkte thahnemngai taka thawhpui tur leh an kut tichaktu, khawtlang leh ram hmasawnna thlentu ni turin MNF VC/LC member thlan tlinte chuan theihtawp an chhuah dawn a. Mipui rorelna kan ramah tun dina a awm zel theihna turin khua leh veng tinah MNF candidate-te in vote hlu tak lo pe vek turin MNF chuan Zoram mipuite kan ngen a che u a ni, Pu Lalruatkima chuan a ti bawk.
