Vawiin November ni 29, 2024 (Zirtawpni) hian Mizo Hnam Runah chhung inkhawm neih a ni a, hun hnihnaah Pu PC.Laldinthara, General Secretary, MNF General Headquarters chuan thu a sawi.
Pu PC.Laldinthara chuan MNF sorkar khan Covid vangin duh anga hna a thawh hman loh thu a sawi a. Sum lamah central atanga lokal pangngai tur kha cheng vaibelchhe sang tel a lokal theilo a. Sorkar khan a mite dam khawchhuahna chiah a ngaihtuah avangin, state dang leh ram dang ngaihtuah chuan covid avanga nunna chan tlemna ber kan ni, a ti.
Pu PC.Laldinthara chuan ZPM sorkar hian VC term a pawh tawi chhan dik tak hi mipui min hrilh rawh se tih chu a zawt a. “Mizoram hian PDRDG hi hmu tlem hle mah ila; covid hrileng a reh hnuin GST leh tax dang hmuh a pung thung a, a hma lama crore 500, 600, 700-te kan hmuh thin kha kum 2023 khan crore 1020.66 kan hmu a, target chu 900 crore a ni. Kum kal ta 2022 kha 120.62 crore in kan khum a. Kum 2024 kum kallai a kan hmuh tawh hi crore 648.17 a ni a, target hi 1200 crore a ni a, khum ngei kan inbeisei. Heng avang hian share of taxes pawh kan la hmu chho zel a. LAD Minister-in chhuanlam siam a, PDRDG kan hmu tlem a, inrenchem a ngaih avangin VC term pawhtawi a ni tih hi inbumna mai a ni. VC term tawp hi August 2025 kum tho a ni a, kum tir, 2025- a inthlan nen a hautakna tur emaw a hautak lohna tur a awm chuang lo, VC term an pawhtawi chhan hi mipui min hrilhfiah rawh se,” a ti.
“Thalaite hnena an sawi fo, thalaite beiseina lian tak siamtu ‘hand holding’ chu kalpui an tum tak tak hun a lo thleng a. Central scheme deuh hlir a ni si. Heng – PMEGP, MUDRA, PMFME te hi central scheme vek a ni a, Mizoramah pawh mi thenkhatin an hmuh kal mek reng a ni. MUDRA loan phei hi chu sumdawng pawl MIMA hian kan buaipuina a rei tawh. Kan member harsa deuhte tan kan dilpui thin a, hmuh chu har tak a ni,” Mizoram Mechants’ Association (MIMA) President ni bawk chuan a ti.
Pu PC.Laldinthara chuan sorkar hian P & E department chu privatise a tum em ni tia zawtin, Advance Metering Infrastructure Service Provider (AMISP) chu e-tender a kalpuia thawktu tur thlan niin, Revamped Distribution Sector Scheme (RDSS) hnuaia smart metering kalpui tur thu sawiin, ZPM sorkar tihchhuah ninawm takin an sawi a. He smart metering hi pre-paid tur a ni a. Sorkar hmasa khan thui tak a kalpui tawh a. Zarkawt a mi thenkhat chuan pilot project kalpuiin hman anihna pawh kum khat chuang vel a ni tawh. Company tuma privatise kawng lam zawh a awm lova, mipui pawhin kan hre vak hek lo. Central sorkarin a tum vek anih loh chuan smart metering hi Mizoramah hman chi a ni lo,” a ti bawk.
“Ni 27.11.2024 khan working committee on Lengpui Airport pawh an Chairman Pu TBC.Lalvenchhunga MLA, Adviser to CM hovin an thukhawm a, IAF kuta Lengpui Airport dah an zir chiang leh a ni awm e. Lengpui a hlawk theih dan kan sawi a, a thawkte ngei pawhin 15 crore hmuh theih an rin thute nen lam min hrilh a. Kum khata senso hi Rs.676.91 lakhs vel niin mi rinawm tak chuan a sawi. Heta tang hian tihtak zeta Lengpui Airport atanga resource ngaihtuah a, sorkarin a hmuh let theih dan tur ngaihtuahin sorkar hi a hlawk hle thei a ni tih hriat a ni a, hralh lam hi kan sorkar hian a tum ber chu niin a lang,” a ti bawk.
Chhung inkhawm hi Pu R.Lalhnuna PAC chuan kaihruaiin, Pu Lalbeiseia, Secretary, MNF General Headquarters chuan hunserh a hmang.
