MNF Policy & Programme Board (MNF P&PB) hotute chu vawiin khan MNF Office ; Mizo Hnam Run ah a vawi 4-na atan an thukhawm a. MNF P&PB Chairman, MNF Sr. Vice President ni bawk, Dr. R. Lalthangliana’n Meeting a kaihruai a. MNF Policy & Programme Board Meeting chuan MNF sorkar liam tain, Mizoram State Health Care Scheme atana Asian Development Bank (ADB) atanga cheng vaibelchhe sang khat (Rs. 1000 crore) soft loan, kum 2021 atanga a lo buaipui tawh, kum 2022-a Ministry of Finance kaltlanga a chhâwlchhin (approved) fel tawh, ZPM sorkar hnuaia bawhzui that a nih loh vanga a tawp ta pawi an tih thu an sawi.
MNF Policy & Programme hotute chuan ZPM Sorkar-in Universal Health Care Scheme an kalpui dan uluk takin a thlir bawk a. Sorkar hnathawk inzawmkhawm pawl, Federation Mizoram Government Employees & Workers te rem tihna telloa Universal Health Care atana an thlatin hlawh cut sak a ni te, inbiakremna tello a, Non Government Hospital Association of Mizoram (NGHAM) Private Hospital te pawh ZPM sorkar-in Rate, Cashless, sum inhlan chhawn dan system fel fai engmah awm loa an barhlui ringawt mai hi MNF Policy duangtute chuan an dem hle.
Mizoram pawna Hospital changtlung te ‘rate’ tha tak offer an nih laia Mizoram chhunga Private Hospital leh Kohhran damdawi In te pawmpui theih loh system fel lo tak an kalpui hi NNF Policy & Programme Board Meeting chuan pawi a ti a. Mipui harsatna tawh nasat zia te hria a, sorkar damdawi in ringawtin mipui mamawhna a phuhruk loh zia te hriain a rang lama inremna siampui tur leh, nu leh pa chan chang taka dawhkan khat hnuaia inremna neihpui turin MNF Policy duangtute chuan ZPM sorkar an phut a ni.
