MPCC Transport Department chuan ni 26.6.2025 (Ningani) khan Mizoram Tripper Drivers Association, Kolasib Sub-Headquarters te kawng siama an hnatlan tanniah a hmunah an tlawh a. Congress Party hmingin hnatlang thingpui inna tur ₹ 2000/- an pek bakah Dr. Lalmalsawma Nghaka, Treasurer MPCC chuan ₹ 10,000/- a pe bawk.
MPCC chuan, “ZPM sorkar chuan ‘Kalphung Thar’ zuarin chumi zingah kawng tha kan neih theih nan tiin Diesel leh Petrol-ah chhiah (cess 2% ve ve) lain September 2024 – March 2025 chhung khan Mizoram sorkar chuan tuialhthei atangin Road Maintenance cess atan chhiah cheng vaibelchhe sawmhnih pathum chuang (₹ 23,43,01,800/-) a dawng niin tarlan a ni a, lirthei hman man nasa takin a pun phah a, mipuiin kan tuar nasa hle a ni. He chhiah an lak hi kawng siamṭhat nana hman a ni lo nge Mizoram kawngpui khawi lai pawh a chhe em em reng hi lirtheia eizawngte tan a rilru nat thlak hle a ni.
“Congress Party chuan a bik takin kan châk lakna ber Vairengte to Aizawl Road via Khamrang – Sairang kawng ZPM sorkarin a ngaihsak lo hi pawi a ti hle a. Lirtheia eizawngte tan mai bakah damlohna avanga hmanhmawh (Emergency) thila veivak mipuite ngaihsak lohna a ni a. Kawng siamna atana chhiah heti zat la sia kawng ngaihsak lo sorkar hi Mizoramah a la awm ngai lova. A rang thei ang bera hma la turin leh Lirthei neitu mipui ngaihsakna thinlung pu turin Congress Party chuan Mizoram sorkar a phut tlat a ni.
“ZPM sorkar hnu thal vawi hnih thleng tawhah kan châk lakna ber kawng NHIDCL kuta awm hi sorkar hian siam tha turin a nawr na ngam lo niin kan hria a. Kan Driver pui motor lian khalhtute a bik takin kan lainat tak zet a. ZPM sorkar leh NHIDCL inkarah hian Transport Department, MPCC chuan puanhnuai thil a awm em? tih hi kan zawhna a ni bawk.
“Mizoram dung leh vang bakah Aizawl khawchhung kawng heti em ema a chhia hi sorkar mualphona a ni a. Party dang aia tha bik anga in tarlang, an that bik lohzia hi Zoram mipuiin kan hmu mek a. Lirthei neia eizawngte bakah mi tlawmngai te’n hnatlanga kawng siam a ngai hialte hi zah nachang hre turah kan ngai a, hetianga kawng chhia hi chhuanlam siam lova a rang thei ang bera siam turin Congress Party chuan ZPM sorkar a phut a ni,” tiin thuchhuah an siam.
