Vawiin ni 20.8.2024 (Thawhlehni) khan School Education Department chuan School chawlh a puang a. School chawlh thu hi zirlai, zirtirtu leh zirlai nu leh pa ten school compound thlen hnuah leh kal kawngah an hre chauh hlawm a, hei vang hian an fate thlah leh lam a ruala tih nghal a ngaih avangin Aizawl khawpuiah Traffic Jam a nasat phah hle a, chawhma dar 11:00 thleng khan harsatna a thlen phah a, kal kawnga tangkhang engemawzat an awm bawk.
July ni 2.2024 (Thawhlehni) khan School Education Department chuan Disaster Management & Rehabilitation Department thurawn angin school chawlh a lo puang thut tawh bawk a. School chawlh puan hi Social Media-ah 9:00 A.M. rik hma deuha darh chauh a nih avangin Zirtirtute, zirlai nu leh pa leh zirlaite buaina nasa takin a lo siam tawh a ni.
MPYCC chuan, “Tlai khawhnua sorkarin School chawlh a puan thut thut avang hian zirlaite nikhat tiffin ei man, zirlaite school a thlah leh hruai hawna manah sum thahnem tak a luangral a. Hemi avang hian zirtirtu leh nu leh pa tamtak chu Sorkar thil tihdanah an lawmlo takzet a ni.
“Intiamkamna nasa tak nei a, engkim zirchiang leh ruahmanna tha zawk nei anga inzuar enchhin sorkar ZPM hian an thlen chin a piangah mipui tana harsatna an thlen a ni ber a. Sorkar hian khawchin tur a lo sawi lawk ve ṭhin a, a ti dik thei lo, a sawi lawk loh hunah ruah a sur leh vak thin. Mizoram mipui, zirlai, zirtirtu,nu leh pa leh zirlai hruaitute nasa taka buaina leh harsatna a siam sak leh thin hi Congress Thalai chuan pawi a ti a. Tum dangah chuan ruahmanna felfai tak nei a, School chawlh chungchang hi puang thin tawh turin Congress Thalai chuan ZPM sawrkar a phut a ni,” an ti.
