Vawiin October ni 18, 2023 hian ZPM Tawngtai Committee, ZPM General Headquaters buatsaihin Serchhip Sub – Headquater YMA hall-ah tawngtai retreat neih a ni a. He hun hi Rev. Darchungnunga, tawngtai pawl chairman-in kaihruaiin, Rev.Biakthansanga’n hunserh a hmang a, tawngtaihona neih a ni. Pu Lalduhoma ZPM leader leh Rev. Dr.K.Thanzauava ZPM Vice President ten thu an sawi a PC Valalhriati hnen atangin fakna hla ngaihthlak a ni bawk.
ZPM Leader Pu Lalduhawma chuan thu sawiin, “Kohhranin corruption kan vei ta hle a. Synod pawhin, ‘corruption laka fihlim lo te chungah thuneihna nei lo mah ila, heng laka fihlim lo te chu rawngbawlna langsarah dah loh nise, danin thiam loh a chantirte chu Kohhranin thunun ni rawhse’ tiin a rel ta hial a. Eirukna laka kan lo fihlim theih nana Kohhrante hmalakna hi a lawmawm hle a ni.
“Kan ram hruaitu ten central-ah sum zuk sawichhuak thin mah se an mahni bawkin an eiru leh thin a, an hnuaia thawk party worker thenkhat ten an pu te eiruk an la sawi mam sak leh zel te hi thil mak a ni. ZPM candidate te erawh chuan ‘ka eiru lovang’ tiin an tlangau mek a, mipuite pawhin ZPM chungah rinna an nghat mek a, he an rinna nghah hi kan lo sawrkar a nih chuan kan tithlawn dawn lo va kan eiru dawn lo a ni. ZPM chuan chhung lam leh pawn lamah beihna tam tak tawk thin mah se, vawiin thlengin Pathianin min la hruai zel a, tawngtai pawl ten tawngtaina nen nasa taka tan an lakna te hi Pathian hian a hria a, an tawngtai chhanna vawiin thleng hian kan la hmu zel a ni,” a ti.
Rev. Dr.K. Thanzauva chuan, “Serchhip chu ram lai li, Chief Minister bial ni rei ber in ni a, thlai thar thawn chhuak hnem tak district in ni. Mipuite rilru a nghet em em a, Pu Lalduhoma pawh hi in phatsan mai mai ka ring lo,” a ti.
“Kan Lalpa khawvela a len lai khan damlo te tidamin rawngbawlna kawng hrang hrang a thawk a, he leiah Pathian zia a rawn lan tir a, midangte tan a in hmang ral vek a ni. Pathian ram chu vision oriented a ni a, kan mihringpui leirem rap hleithei lo te tana hmathlir neia rawng inbawlsak tawn hi Pathian ramin a tum a ni. Mizoramah Kohhran tha tak kan nei a, hetiang taka Kohhran inrelbawlna tha hi khawvel hmun dangah hmuh tur a vang khawp mai. Chutih lai mekin politics huangah erawh kan tha lo em em a, hei vang hian thinlung zawng zawnga Pathian kan auh hi a hun ta a ni,” a ti bawk.
