Ni 23 & 24 March, 2022 khan ZPM Thalai-te chu ZPM Thalai Hqrs. President, Pu Malsawmzuala Ralte hovin Aizawl North leh Aizawl South Treasury Office-ah lêngin, Mizoram sum dinhmun an sawipui a. ZPM Ṭhalai hruaitute’n Treasury Officer-te an kawmna atangin Mizoram sum dinhmun chu a tha lo takzet tih a hriat theih thu an sawi a ni. “Financial year tawp nan hna thawhna hun ni 5 bak a awm tawh lo chungin, Aizawl North Treasury-ah nikhata sum pekchhuah theih zat (daily ceiling limit) chu cheng nuai 40 a ni a, Aizawl South Treasury-ah nikhata sum pekchhuah theih zat chu cheng nuai 65 a ni bawk. Aizawl South Treasury lamah hian sawrkâr hnathawkte GP Fund tâng tlingkhawm chu cheng vaibelchhe 28 vel a ni a, bill tâng hi vaibêlchhe 500 vel awm ni-a chhut a ni bawk. Aizawl North Treasury lamah pawh GP Fund tâng tlingkhawm cheng vaibelchhe 40 vel awm ni-a chhut a ni.
Aizawl North leh South Treasury-ah hian kum dang ang lo takin sum khawih chet tur a awm mang lova, bill pending tam tak a awm a, kum danga daily ceiling limit sang tak ni thin kha kuminah chuan sum awm loh avângin an ti thei lo a ni. Bill hrim hrim pawh Finance Dept. phalna lo chuan pek chhuah theih a nih meuh loh thu dawn a ni bawk.
“Financial Year tawp dawn tawhah pawh nikhata sum pekchhuah theih zat nuai 40 leh nuai 65 chauh a la ni mai hi a mak hle a. Aizawl North leh South Treasury hi tun dinhmunah chuan khar tlukah ZPM Thalai chuan kan ngai a ni. Contractor lian bill pakhat pawh zat mang lo tur chauh pek chhuah theih a nih avang hian Mizoram sum tam tak hi a lapse dawn nge, a thuin K-Deposit-ah kan dah leh teuh dawn? tih hi ZPM Thalai chuan Finance changtu kan CM kan zawt a ni,” tiin ZPM Thalai chuan thuchhuah an siam a ni.
