Aizawl, 22nd March, 2022 : Vawiin khan ZPM Party chuan Aizawl Civil Hospital-a hun rei tak CT Scan khawl hman theihloha awm leh hemi avanga damlote harsatna tawh te a hmunah an enfiah a. Thil awmdan zawtfiahin Directorate of Health and Medical Education an kal zui nghal bawk a ni. He hunah hian ZPM Legislature Party Secretary Dr. Vanlalthlana, PAC Member Pu TBC Lalvenchhunga, Vigilance Department leh Media & Publicity Department-te an kal a ni.
Dr. Vanlalthlana, MLA chuan, “Sawrkar kalphungah hian chawplehchilha thil tih rum rum theih a ni lo tih hre mah ila, thla 6 dawn lai mai CT Scan khawl hman theih loh a ni ta hi a pawi kan ti a, mipui mamawhna a nasat em avangin a rang lama hman a nih thuai theih nan kan sawrkar hian hma la thuai se kan duh a ni. Mipuite tawrhna leh hrehawmna hi sawrkar tawrhna leh hrehawmna ni se, natna nei te nat rual hian kan sawrkar hi na ve se tih hi vawiina CT Scan khawl hman theih loha awm, a hmun ngeia kan tlawh chhan a ni,” a ti.
Hetianga mipui mamawh lian tak, nunna leh thihna hril thei damlo inenkawlna khawl pawimawh hun rei tak hman theihloha awm hi ZPM chuan pawi a ti hle a, mipuite aiawha dingin Aizawl Civil Hospital CT Scan hi a enzui reng dawn a ni.
