Vawiin khan ZPM Thalaite chuan thuchhuah siamin, “Mizoram Assembly budget session neih mekah ZPM member Pu C.Lalsawivunga zawhna ziaka a chhânna-ah, Finance Miniter Pu Zoramthanga, Chief Minister chuan, Mizoram sawrkar leiba neih zat chu kum 2020-21-ah cheng vaibelchhe 9,881,09 a ni tih sawiin, kan leiba-te chu financial management thiam loh vang a ni lo tih a sawi bâkah, Mizoram leiba leh state lian, thawhchhuah ngah tak takte leiba nen a tehkhin chuan sum enkawl kawnga a hlawhchham zia amah leh amah a inpuang ni berin kan hria a, state hausate leibat leh keini state pachhe tak leibat chu tekhin chi-ah kan ngai lova; Pu Zoramthanga hian a finance portfolio hi midang thiam zawkte kian ngam turin kan phut,” an ti.
Thuchhuahah chuan, “Pu Zoramthanga’n sawrkar hnathawk hlawh a hun taka pek theih loh chu sawrkar mualphona a nih loh thu a sawi phei kha chu, sawrkâr hnathawkte tham lohna lian takah ZPM Ṭhalai chuan kan ngai a, hripui len laia an hlawh-te pawh pûk tîr a, nasa taka sawrkâr mualpho tur lo vêngtu a hnathawkte hi MNF sawrkâr hian a hmusit hlein kan hria.
“MNF sawrkârin Mizoram budget aṭanga SEDP a kalpui pawh hi an sawrkâr hmaa tuna kan C.M thusawi nen chuan a inperhsan hle a, tuna kan kal dânah chuan SEDP atana an pek tam pauh leh thil dang atana hna thawhna tur chu a heu mai dawn ni-a a lan avângin, SEDP sem tur hi khurpui kang chat thei lo ami thâl a, sem turin kan phut a ni,” tiin an tarlang bawk.
