Vawiin March 7, 2023 (Thawhlehni) hian PC Party Sr.Vice President Lalrinzuala Chawngthu chuan thuchhuah (Press Statement) siamin, ”Tun hnaiah Mizoram Excise Department te’n Ṭhalaite Zu tlan ṭhinin reilote chhûnga mihringte hriselna a khawihchhiat nasat theihzia leh nunna a pawh tawi theihzia an thuchhuah ah an tarlan rualin, Zu siamna hmunpui (Zu Factory) an tihchhiatna te pawh an tarlanna Television leh nitin chanchinbu aṭang te in kan lo hria a; Hei hian Zu in duh leh Zu inlo thei lo te tan Zu ṭha leh pangngai tak inkhuahkhirhna dan hnuaia awmze nei leh fel taka kalpui a ṭulzia a tilang chiang hle a ni,” a ti a;
Lalrinzuala Chawngthu chuan, zu chhe nghawng ni ngei a ngaih theih tura Mizo ṭhalaite nunna chân tamzia sawiin, “Kumina Central KṬP rorel inkhawm vawi 10-na Zemabawk Presbyterian biak-ina nei in a tarlan danin Kum 2022 chhûng in KṬP member mi 643 an thi a, hei hi Mizorama KṬP member boral tam ber kum a nih thu report-a a lan dan a ni a; Hei bàkah pawh hian Vengtin, khawtin-a zu chhe in avanga ṭhalai leh la pavalai tak takte boral engemawzat an awm a ni,” a ti bawk.
Tawng pawng zu khap bur ringawt hi Zoram hian a ṭhatpui aiin a chhiatpui hle zawkah PC Party chuan kan ngai tih sawiin Pu Rina chuan, ”PC Party in Zu zawrh leh Zu in hi ṭha kan tih loh rualin,Khawvel awm chhûngin Zoramah ngei pawh, zu in duh leh zu in lo thei lo dinhmuna dingte kan bâng dawn chuang lo niin a lang a, chuvangin zu khap burna kalpui inti chung reng si a Zu chhe in tur awm reng leh khap daih theih chuan siloh buaipuia kan thih zawih zawih reng ai chuan, inkhuahkhirhna mumal leh awmze nei tak hmanga Zu siam hi kan ram leh hnam hmakhua atan leh kan economy hmasawn nan a ṭul kan ti hle a ni,” a ti bawk.
