Zu man tel a ni lo : MCDA

Aizawl June 8 : Tun hnai maia Millennium Centre-a Grape wine man chungchangah Millennium Centre Dawrkai Association (MCDA) chuan thu leh hla a tam hle nia sawiin, “Ni 27. May 2022 a END ten zu an check-na lama Millennium Centre chhunga Grape wine leh Mizoram thar chhuah wine dang an man tel hi pawi kan ti hle a ni,” an ti.
MCDA chuan., “Kan sawrkar leh Grape chingtu lamten inhriatthiamna kara thlamuang taka an eizawnna an kalpui laia, an thil zawrh lai zawng zawng man sak vek an ni ta mai hi a pawi kan ti a. Kan sawrkar lam hian pe let leh se kan duh tak meuh meuh a ni. An pe let lo anih pawhin an man sak ang hu tal zangnadawmna pe ngei se tih hi kan duh dan a ni. MC a grape wine zuarte atang hian sawrkar duh loh leh phal loh, zu man tel a ni lo a ni. Kan member-ten eizawnna bera an hman mansak vek an nih takah chuan kan sawrkar hian chem lovin an lu an laksak a ni ngawt a. An mangang tak zet a ni.
“Sawrkar lam hian Mizorama thar chhuah hi zawrh a phal dawn lo anih chuan an hralh zawh hma chu nghakin emaw, hun tiam an siamsak ngei turah kan ngaiin kan beiseipui em em a. Hetiang ngawt hian kan sawrkar hian kan ram mipui, kut hnathawkte thar chhuah, grape wine an mante hi man hlensakin, kut hna thawktute a ti mangang tak tak duhin kan ring lo a. An mansak hi a pe let leh hram sela. A pe let ta lo anih pawhin, a mansak man hu kan sawrkar hian zangnadawmna angin chhawmdawlna pe ngei se tih hi kan duh dan a ni,” tiin vawiina thuchhuah an siamah an tarlang.