MNF Aizawl East-I Block te chuan, tun hnaia Aizawl East-I huam chhunga awm Hot Mix Plant Zuangtui a mi chu, khawtlang mipui ten an duh lohna an lan tir chungchang ah, “Zuangtui khawtlang tawrhna hi kan hrethiama, an thiam ang tawka hma an lo lakna ah tih sual palh an neih a lo awm chuan, sawrkar pawhin hrethiam a ngaidam turin kan ngen sak tak meuh meuh a ni,” an ti.
Vawiina thuchhuah an siamah MNF chuan, “He Hot Mix Plant hi Polution Control board pawhin a awmna hmun a dik loh dan te, khawpui area atanga KM 1 ai a hnai lo leh sakhaw biakna hmun atanga 0.5KM ai a hnai lo ah tih te a ni, mahse he Hot Mix Plant hi khawpui chhung ah leh Biakin kawt deuh chiah ah a awm nghe nghe a ni.
Heng bakah hian, he khawlin Polution chhia a tih chhuah tam loh nana diesel hman tur tih a nih laiin, diesel ai a chhe zawk leh la refined loh crude oil an hmang leh zel te hi a dik lova, Chu mi piah lamah a khu leh a rima chhuah tam loh nana a hnuaia tui awm reng tur chu tui dah a ni ngai lova, Zuangtui khawtlang pawhin pipe lei ula luikawr tui kan laksak ang che u te pawh ti thin mahse an ngaihsak ngai lo a ni.
“Lirthei neihtu mipui te lakah sawrkar hian polution certificate an strict em em lai a, a sawrkar zawkin sawrkar dan hre reng chunga a bawhchhe reng mai te kha mipui min tham lohna a ni a, Mizoram Polution Control Board hian sum tam tak chawi tir ngei bawk rawh se.
“15th Thursday 2025 ral hma ngeiin, dan dik lova Hot Mix Plant khawl hman avanga harsatna thleng chungchang ah, PWD te hian an FIR theh luh hi an withdraw lo a nih chuan, Zuangtui a PWD Quality Control, research and development office staff te an office kal tur tiamchin awm lova dan an ni ang.
“Dan tam tak bawhchhe chunga Zuangtui khawtlang laka FIR an la thehlut ngam te hi mak kan ti a, kan Home minister pawhin an FIR thehluh te lo register tir lo tur leh Polution Control Board te dan an bawhchhiat chungchang ah dan anga thubuai lo siamsak zawk turin kan ngen a ni.
“Zuangtuia Local Council Chairman pawh hmuin Party khat ni lo mah ila, Zuangtui khawtlang mipui te a tawp thlenga kan support tur thu leh a tul a nih phawt chuan an tan ai pawh kan tang huam a ni.
“Dan dik takin he khawl hi hman nise chu, Zuangtui khawtlang te hian an venga tanga sawn chhuah em em pawh an tum a ni ber lo, mahse tu mitmei mah veng lova dan an bawhchhe lui tlat avanga he boruak hi thleng a ni tih hi Zoram mipui ten i hriatsak ang u,” tiin an tarlang bawk.
