Mizoram pawn aṭanga Zudio LPS Pro Fight-a telte tan hamṭhatna inang tlang siamsak a ni dawn.
Organising Committee chuan sumo fare angin Aizawl aṭanga an rawn kalna leh hawna man a tumsak dawn a. Championship-a an tel chhungin an thleng sang emaw an tla hma emaw an mamawh phuhruk nan Rs 5000 ṭheuh a pe bawk ang.
Hun tawp October 19 thlenga entry form theh lut 320 chuang zingah Mizoram pawh aṭangin Pro Fight ngaihluin boxer 13 – Lamka, (Manipur) aṭangin pasarih, Meghalaya aṭangin pali, Assam leh Myanmar aṭangin pakhat ve ve an awm a ni.
An inbuk fel hnua inhnek thei tur ziah luhte hnenah hamṭhatna pek a ni dawn a, Mizorama awm sa raltlante erawh a huam lo ang.
Pro Fight vawi 11-naah hian Title Fight bik chauh khawvel puma professional boxing chhinchhiahna boxrec-ah ziah luh tur a ni a. Title Fight neih a nih hmain weight hrang hranga champion laite leh title chuh tura tlingte an inbuk ṭha leh dawn a ni.
Champion lai tel lovin October 28, kar leh thawhṭanni zing dar 8 aṭanga chhun dar 12 chhungin LPS Arena, Falkland-ah tel tumte an inbuk dawn a, an hriselna endik hmasak a ni ang. Hemi ni chawhnu dar 2-ah Referee leh Judge turten clinic an nei zui nghal bawk ang.
November 1, kar leh zirtawpni zanah LPS Arena-ah ṭanin a hawnnaah hian Youth Icon Lalsangliana a zai dawn a, man chawi lovin a hmunah a duh apiang tan en theih a ni ang.
