Vawiin September ni 9, 2022 Zirtawpni hian Mizo Hnam Runah chhung inkhawm neih a ni a. Hun hnihnaah (Political session) Lalruatkima, MNF Adviser leh Minister ni bawk chuan thu a sawi.
Lalruatkima chuan Sorkar-in Assembly koh hlan a nghakhlel em em a, dan siam ṭhat ngai siam ṭhat nan te, dan siam thar ngai siamna hun atan Assembly session neih hun hi an nghakhlel ṭhin tih a sawi. Thla ruk danah Assembly session hi neih ziah tur a ni a, session neih zawh tak kha MNF sorkar hnua session vawi 10 na a nih thu a sawi.
MNF Adviser chuan Session neih zawh tak chungchang sawi langin, House a pharh tak ‘ The Mizoram (Land Revenue) (Amendment) Bill, 2022 chu mi retheite tana ṭha tur zawk a ni tih sawiin House-a Amendmend siam tam zawk hian mi retheite a neksawr ngai lo a ti. Opposition MLA House a ṭanga chhuaktau daih khan a chhiar chian loh vang a ni a, ‘Property card kha ka bialah rawn ti vat vat ula’ titu tur kha a chhuak daih mai a, a hriat lohzia a inhre lo a ni a ti. Congress sorkar khan Mizoram Land Revenue Rules 2017 an siam a, Act ah an lo siam reng reng lova. Anmahni hun laia siam, dan anga siam danglama mipuite leh sorkar tana tha tura ruahman a ni. A mual boin an bo a, Zawlbuka an ek tan kha, then kan tum a, anmahni chuan ‘tunge e’ an tia, anmahni ek a ni reng si a ti.
Pu Ruatkima chuan “Legislator ten Dan kan siam a, chumi behchhan chuan Court in thutlukna a siam ṭhin. ‘Court-ah kan chak leh chuang lovang’ ti a, Dan siamtu aia court kha thunei zawka ngai House chhungah an awm tlat a. Chief Minister ni ta se khuar khurumah min tlak pui ang tih hlauhawm khawpin a bo tlat a ni” a ti.
Minister chuan The Mizoram (Land Revenue) (Amendment) Bill, 2022 kha thingtlang mi tan malsawmna a ni dâwn. LSC an duh reng, an neih theih loh kha Property card an nei anga, property card hmangin Loan te a la thei tawh dâwn a ni. Tuna zangnadawmna lakna tur hoah hian ‘cut’ a ni dâwn lo, thil kal mek a nih avangin. Thil lo la awm turah chauh ‘cut’ a ni dâwn a ti.
CM car hman tur lei chungchang sawi langin, Congress sorkar lai khan Motor thar lei thuah khatih laia CM khan, “vawi khat pawh budget la pharh lo hian motor lei chungchang hi lo sawisel ve tawh suh u,” a ti hial a nih kha. Sorkarin Motor hi ṭul loah lei a ni ngai lo a ti . Kum 2018 inthlan dawnah ZPM hotuten an MLA candidate te an kokhawm a, “ MLA hamthatna dawn zinga mi Car leina (nuai 10) ka la lo ang, MLA hlawh pung la lo turin ka intiam e,” tiin an intiamtir a, an chham rual dual dual a. Assembly Secretariat-ah MLA Car loan la hmasaber zawh a ni a, ‘Pu Lalduhoma’ tih chu chhanna a ni a ti.
Lalruatkima chuan BADP hna atangin 25% hi in ei em ni? tiin opposition MLA kha a rak dar dar a. 25% hi ei tur a awm lo, lak tur pawh a awm lo. Sevadal training chhuak zawhna, dawt 100 i sawia pakhatin an awih pawhin a hlawk tho tih ang chi hi chu tunlai khawvelah an ching tawh lo a ti.
House pass dilna Minister kaltlanga tih ngai chungchang pawh sawi langin, Pu Ruatkima chuan Congress sorkar laia kalpui tawh anga kalpui zel a ni. Surveyor indaih ni ila kan thlah zalen thei reng a ni a ti.
Pu Ruatkima chuan MNF sorkar hnuah Zirtirtu ringawt pawh 3000 (MR+SEDP) chuang lak an ni tawh tih sawi langin, Two Wheeler taxi permit pawh 3000 vel pek chhuak a ni tawh a. ‘Mi ṭhahnem tak tan eizawnna kan siam der tawh tihna a ni’ a ti. Minister chuan ‘Pathian in kan sorkar min veng a, Sorkar hnathawk hlawh pawh a hun takah release a ni leh mai dâwn’ a ni. Ṭampui mitthi ang maia kum hnih zet hripui leng karah pawh buhfai lamah harsatna kan tawk lova. Tun hnaiah Mizoramin ‘Best Agriculture State in North East India Award’ kan dawng a, Delhi lamah kan Agriculture Minister-in Union Minister hnenah a dawng dâwn a ni. ‘Kan Minister leh kan sorkar hian thawk ṭha lo ni ila he lawmman hi kan dawng hauh lovang. A ṭha ber in ni e tia min thlangtu hi Ministry of Agriculture a ni tlat’ a ti.
Lalruatkima chuan kum 2023-ah Pathian leh Mipuite zarah an sorkar leh ngei a ring tih sawiin, Opposition hoin, ‘CM hi a tla ang, a bial a buai em mai’ an ti a. Mahse, inkhelhnaah pawh inchuh buaina karah zel lawm kan pet goal ṭhin le’ a ti.
Rural Development Minister chuan a department chanah pawh kum thum chhung ni 100 in hlawhna za-ah za inhlawhna siam a ni thei chu chunglam hruaina vang a ni a ti.
‘Kum hnih chhung zet hun ṭha loa min hruaitu hian hun ṭha min pek hi ka ring tlat a. Kum nga dang, a vur kum hi Pathianin min la pe leh in ka ring a ni. Lungrualna leh thawhrimna nen kan kal a, Pathian leh kan ram tan tia kan ṭan tlat chuan hun thar kan chuangkai ngei ang. Kum 2027/2028-ah chuan Champhai khi lehlangin a kal theih tawh ang a, Pu Zoramthanga kaihhruaina hnuaiah he ram hmasawnna hi kan hmu zel dâwn a ni’ a ti.
