Aizawl khawpui hmun hrang hrangah hnam dang dan lova khawsa dapchhuah hnatlang nei

Vawiin ni 28th October, 2023 (Inrinni)hian MZP bultumin Aizawl khawpui hmun hrang hrangah hnam dang dan lova khawsa dapchhuah hnatlang neih a ni a, Inner Line Permit (ILP) nei lo mi sawm sarih Pariat (78) chuang bakah kum tling lo hnathawka chhawr engemaw zat hmuhchhuah niin thuneitute kutah hlan nghal an ni.

Sorkar leh thuneitute pawhin theihtawp chhuaha hma an lak mek lai a, tukkhat hnatlana hnamdang permit nei lova khawsa leh dan lova sumdawng thahnem tak man chhuah tur an awm hi MZP chuan pawi a ti hle a, heng hnam dang dan lova khawsate hi permit neilo bakah permit dam hun chhung zo tawh te anni hlawm a ni.

MZP chuan India danpuiin a bik taka min humhalhna dan Inner Line Permit (ILP) hi a nihna ang taka hmang tur leh a pekchhuah dan chungchangah pawh fimkhur leh zuala kalpui turin thuneitute a ngen nawn leh a. Mizoram chhunga Local Council leh Village Council thuneitu zawng zawngte, hnam dang permit ILP issue chungchangah document felfai lo chu hriatpuina lehkha pechhuak tawh lo turin a ngen bawk a ni.

Dan lova hnam dang khawsate dapchhuah hnatlangah hian MZP hruaitute bakah College hrang hrang Students Union (SU) hruaitute leh Hnampual Zirlai Pawl hrang hrang hruaitu mi thahnem tak an thawkchhuak a ni. Tin, MZP chuan hnam dang dan lova khawsa a hmuhchhuah te chinchang chu ngun takin a enzui dawn a, thawnkir (push back) an nih dan pawh a enzui dawn a ni. MZP chuan Mizoram chhung a dan lova hnam dang sumdawng te dapchhuakin a tul angin hma a la zel dawn a, hnam dang dan lova Sumdawng te dapchhuah kawngah hian MZP chuan Zoram mipuite thlawpna a ngen tak meuh a ni.