Chief Minister Pu Zoramthanga chuan vawiin khan Science Teachers’ Association Mizoram (STAM) General Conference, Synod Conference Centre-a neih chu khuallian niin a hmanpui a. School Education Director Dr. H. Lalthlangliana chu khualzahawm a ni.
Chief Minister chuan state in zirna kawnga hma a sawn theih nan sawrkarin theihtawp a chhuah zui zel dan te, zirtirtu leh mamawh dang hrang hrangte phurhu tura hma lak zel a nih tur thute sawiin, zirtirtute pawh theihtawp chhuah zel turin a sawm a. National Institute of Technology (NIT) a nih dan tur ang taka din a nih theih nan theihtawpa a umpui tur thu a sawi bawk. Chief Minister chuan ram hmasawnna atana hmalakna chu ramngaw leh nungcha humhalhna nen a inkalh ni lovin, a kal kawp theih dan zawn zel a pawimawh a tih thu a sawi a. Thil tihdan phung tha lo te, kan thil hman environment tana tha lo (eg. plastic, etc) te pawh a thlakna tur a awm theih zel dan leh, ngaihtuahchhuah zel a tul thu te a sawi a. Khuallian chuan ram leh a chhunga chengte rualkhai leh ngelnghet taka hma kan sawn zel theihna tur chuan ngaihtuahna tidanglam a, ramchhunga awm sa leh neih sa te tangkai leh zual zawka hmang thiam turin, mahni thawhna zawn theuh a thahnemngai taka thawh a pawimawh thu sawiin, chumi atan chuan science zirtirtu kalkhawmte pawh a sawm a ni.
Khual zahawm, School Education Director Dr. H. Lalthlangliana chuan zirtirtu indaih lohna phuhruk tura Sorkarin hma a laknaah lawmthu a sawi a. Zirtirtu hna chu missionary hna nen khaikhinin, an thawhna hmun chu khawi pawh ni se, hmanrua a tha emaw tha lo emaw, inpekna rilru nen zirtir hna thawk zel thin turin zirtirtute a chah a ni.
STAM conference hi session pahnihah then niin, chawhma lam session hi Pu Lalhmukima, Vice President in inkhawm a kaihruai a. Pu Zothanliana, Gen Secy in kum kalta chhunga STAM hmalakna hrang hrang report pein, Pu Lalmuanpuia Jt. Secy kaihhruainain member kal tate sunna hun hman a ni. He hunah hian STAM in magazine a buatsaih, Mizoram Science Journal tana thawh hlawkte tan Award sem a ni a. Dr. Krista Roluahpuia, Asst Prof., IIT Gandhinagar chuan Best Contributor award dawngin, Dr. Jehova Ringzuala, Trinity Hospital chuan Best Article Award a dawng a. Heng lawmman te hi khuallian chuan a hlan a ni.
STAM President Dr. R. Lalengmawia chuan thu sawi bawkin, Science thiamna tihhmasawn leh hman tangkai kawnga STAM hmalak tawhna leh hmachhawp hrang hrang a tarlang a. Chung zinga langsar zualte chu – Mizoram Science Journal (MSJ) chhuah te, Science project siam lama naupangte inelna Childrens’ Science Congress buatsaih te, Puithuna atthlak umbo tura Science thiamna hman tangkai te, Mizoram tan Central University (MZU) kan neih theih nana beih te, Aizawl khawpuia Polythene hman dan zir chian te, Pawl 10 leh Pawl 12 a Science leh Mathematics subject topper chawimawi te, NIT Mizoram changtlung tak neih theih nan leh Directorate of Science & Technology chu Department puitlinga hlan kai a nih theih nana hma lak mek te a ni.
Environment venhim a tulzia zir chiang tura Tlawng lui dung zawh chhuaktu Pu Romalsawma (Roma) pawhin he hunah hian thu a sawi a ni. Chawhnu session-ah hruaitu thlan leh rorel inkhawm neih chhunzawm a ni a.
Chawhnu hunah hian Dr. Krista Roluahpuia, Asst. Prof., IIT Gandhinagar chuan “Scientific thinking: Why is Science important?” tih thupui hmangin Science pawimawhna kawng hrang hrang a sawi bawk.
STAM in Science magazine an tih chhuah, Mizoram Science Journal hi Mizorama zirna leh Science lam hawi magazine zingah mei mit lova tih chhuah rei ber a ni a. Childrens’ Science Congress kaltlangin science zirna kawngah naupang tui tak tak eng emaw zat a chher chhuak tawh bawk a ni.
