Congress President hlui Lal Thanhawla chawimawi

Mizoramin remna leh muanna a neih theihna atana lalthutthleng kiantu Pu Lal Thanhawla, CM hlui leh Congress President hlui chawimawina hun, Golden Hall, Congress Bhavan-ah vawiin khan MPYCC bul tumin neih a ni.
He hunah hian Lal Thanhawla chuan Mizoram buai tan dan leh thil thlen dante sawiin, zanlai dar 12-a inkah tan tura engkim ruahman fel vek a nih tawh laiin, MNF President Pu Laldenga berin inkah hma lawk, zan dar 11 velah thulh leh mai a duh thu a sawi a. Mahse, Sangau leh Tuipang lamte hrilh theih a nih tawh loh avangin loh theih lohin inkahna a thleng ta a, ram a buai zui ta a ni tih a sawi.
“Remna leh muanna a awm theih nan khan lalna kiantu neih a ngai tlat a. A hma a inremna lo siam tawhte pawh kiantu an awm theih loh vanga hlawhtling thei lo a ni. Chuvangin, remna leh muanna a thlen theih nan lalthutthleng kan kian ta mai a ni. Remna leh muanna a awm dawn tih a chian hnuah khan thangthat lak tum an tam hle mai a. Kei pawh bang duh tak tak lo ang hiala puh ka ni. Mahse, a hma a ka sawi tawh, remna leh muanna awmna tur a nih chuan minute khat pawh ka in ngaihtuah lo ang ka lo tih tawh ang khan nihna ken kha ka pawiti reng reng lo. Amaherawhchu, khatih lai khan bang ta ngawt ila, President rule-ah kan awm mai a ngai dawn si a, a hma a President rule a kan awm fo tawh avangin a hrehawm zia kan hrechiang a, engkim ti fel hmasa lo chuan ban ngawt chi a ni lo a ni,” a ti.
“London a awm Pu Laldenga zu ko haw tura khan Pu Lalduhoma kha Passport nei remchang a nih avanga tir kan ni a, Indira Gandhi tirh a ni lo. Lal Thanhawla te, CL Ruala te leh Congress party hruaitute tirh a ni. Return ticket nen lama kan pek bakah pocket money cheng sing 3 nge sing 5 ka chiang ta lo, kan pe bawk. Congress Party hian remna leh muanna a ngai pawimawh a, lal thutthleng kan ken mai bakah ram mu lo haw, chenna tur nei lote tan kan in sakte pawh kan ti ruak a ni”, a ti.
Lal Thanhawla chuan, “MNF party in remna leh muanna Mizoramin kan neih hnu kum 11-ah pawh martar-te chhawmdawl emaw leh an puala hmalakna a nei miah lova. Congress Party chuan Mizoram tana Maichama an thisen hlu tak dahkhamtute pualin kum 1997 June ni 27 khan CTI Sesawng-ah Lung phun a ni,” a ti a, “Martar chhungkua (PAMRA) te tan MNF sorkar in a dinsak theih loh Peace Accord Review Committee pawh kum 2008-a sorkar thar a lo din khan din a ni a. Sorkar hna te an tan bik pek a ni a, duhsak theihna hrang hrangah duhsak an ni,” a ti bawk.
“Remna leh muanna atana Kohhranin tawngtaina bakah tha nasa takin an thawk a, a thawhhlawk ber an ni. Remna leh muanna atan a thawk lem lo, Politics thila thangthat lak duh vanga thangthar ram buai hun hrehawm leh pik rapthlak zia pawh hre lo te hnenah thudik tak hrilh loa thiam taka thil dik lo hrilh an awm thin hi a pawi hle a ni,” a ti bawk.
He hunah hian Pu Chawngkunga, Ex Minister pawhin thu sawiin, “Hun rei tak Remna leh muanna atana Pu Lal Thanhawla inpekna hi a rei telh telh ang a, kan hlut telh telh dawn a ni,” a ti bawk.
He hun hi MPYCC President Dr. Lalmalsawma Nghaka’n a kaihruai a. C. Lalhriatpuia Media Secretary in remna leh muanna atana Lal Thanhawla chet dan Powerpoint Presentation a pe a. MP hlui CL Ruala’n thu a sawi bakah Ngurdingpuia Pachuau, MPYCC Treasurer-in lawmthu a sawi bawk.