Mizo National Front chuan vawiin khan Mizo Hnam Runah Chhung Inkhawm hmangin, hun hnihna Political Sessionah Er. Lalrinawma, Ex-Minister & General Secretary, MNF chuan thusawiin, Pathianin hnama min dinna chhawm nung tur leh tungding zel tura khawvel hriat thama sul lo sutu leh thih huama inpe, Hnam pa Pu Laldenga leh kan hruaitu hmasa te, hnam pasalṭha te kha vawiina Mizoram tan hian an hlu tak zet a. Hnam pasalthate hlutna hi Thangtharten kan la hmuh belh deuh deuh dawn a ni, a ti.
Pu Rinawma chuan, Khawvelah hian humhalh loh hnam leh ṭawng tam tak a bo tawh a, a bo mek zel a, chutiang laka kan himna tura chi nung tuhtu Pu Laldenga leh a hnungzuitute chi tuh Mizo Nationalism hi a duah chho zel dawn a. Chumi chhawmnun hna thawh chu vawiina keiniho hian kan hna pawimawh berte zing ami a ni, a ti bawk.
Pathianin chenna tur ram min pe a, hnamah min siam a, chuvangin kan hnam ziarang te hi kan hnualsuat tur a ni lo, tiin, khawvelin min hlutpui zawk tih hriaiin chhuang takin kan chhawmnung zel tur a ni, a ti bawk.
MNF General Secretary Er. Rinawma chuan, Hmasawnna hi a ṭul rualin, hnam phumbo zawnga hmasawn a hlauhawm em em a ni. Hnam humhim pawimawh zia hriain Remna thuthlung ah pawh India Danpuiah, Kan hotute remhriatna leh ngaihpawimawhna a avangin, Mizo hnam ziarang leh sakhaw humhimna tur pawh telh a ni a. Kan ram leh hnam himna turin MNF party hi a sulsutu niin mawhphurhna huai takin a lak thin angin, a awmna apiangah tlanchhe lovin a la mek zel bawk a ni, a ti bawk.
Ex-Minister Pu Rinawma chuan, MNF in Independence a puan- kum 60-na champha lawm tura party inbuatsaihna leh hmalakna azarah, Mizote hi hnamah kan harhthar leh zual ka beiaei tlat a ni, a ti bawk.
