Mizoram sawrkar chungah AMFU lawm

All Mizoram Farmers Union (AMFU) chuan vawiin khan Office Bearers meeting an General Headquarters Office-ah an nei a. AMFU hmalakna tur hrang hrangte leh hmalak tawhnate an thlirho a ni.
AMFU OB meeting chuan, Mizoram sawrkar-in an ngenna ngaipawimawha, Mizorama Grape chingtute hmakhua ngaia, ‘The Mizoram Liquor (Prohibition) Draft Rule 2022’ ennawnnaah Mizoram chhunga kuthnathawktute Grape thar chhuah, dan hnuaia Wine anga siam a, hralh chhuah theih tura a pawm chu lawmawm an ti hle a. “Mizoram Sawrkar in kuthnathawktute tharchhuah hralhna min dappui a, ram chhung leh ram pawn thlenga kan thlai tharchhuahte thawn chhuah mek a ni hi lawmawm kan ti a. Hun lo kal zel turah pawh kan thlai thar chhuahte a hralhna min ngaihtuah sak zel turin kan beisei a ni,” tn ti.
AMFU chuan, “Hripui leng leh chhan dang dangte avanga kan ram sum dinhmun a that loh lai a, kuthnathawktute dawmkanna tura hmalakna SEDP a taka kalpui tan a ni ta hi AMFU chuan lawmawm kan ti a. He SEDP hmalakna hi a hlawhtlin ngei theih nan a enkawltu leh a dawngtuten theihtawp chhuah theuh turin kan in ngen tak meuh a ni,” an ti bawk.