PATHIAN LEH MIPUI DUHSAKNA CHANGIN MNF A SAWRKAR LEH DAWN : MNF

Mizo National Front General Headquarters chuan thuchhuah siamin, “Kan hma lawk 7, November 2023-a Assembly inthlan lo awm turah MNF chuan rampum huapin kil tinah hma ala chho zel a. Thlanchhuah ni tura MNF Candidate te an ṭha tlangin mipuite ngaihzawn an hlawh hlawm hle niin kan hria a, kan lawm hle. Kohhran Upa ni mek 12, Phd. (Doctorate degree nei) 5, Medical Doctor 1, Engineer Degree nei 4, leh Rampum huap tlawmngai Pawla hruaitu hlun lo ni tawh engemaw zat an ni a. Sawrkar tha leh chak din tura rin ngam thiau, eiru lo tura intiam ve ngai lo, eiruk tum reng reng lo vek an ni. Pathian leh mipuite duhsakna changin kan sawrkar leh ngei beiseina sang tak kan nei a ni,” an ti.

Thuchhuahah chuan, “Tun term kal mekah khawvel pum huapin harsatna in min tlakbuak a. India ram pawh bang bik lovin, harsatna a tawk nasa hle a. Mizoramah ngat phei chuan heng harsatna bakah hian ran pul hri, Lirnging, kangmei chhuak, ramri buaina leh thenawm ram buaiin namen lovin min nuai a. Heng harsatna kara Sawrkarna chang kan ni tih leh, Kohhran leh Tlawmngai pawl nen theihtawp chhuahin Pathian au chunga paltlang kan ni, tih hi Zoram mipuiten an hria a, hemi karah hmasawnna tam tak kil tina hmuh theih awm pawh hi an hmuh hmaih lo tih a hriat a. Hun ralmuang a, hmasawnna nasa zawk leh kan hnam leh sakhua humhim zela thawk tur hian mipuiten MNF sawrkar hi rintawkna neiin, duhsakna an hlan ngei kan ring tlat a ni.

“Campaign rusum thlakin kil tinah MNF chuan hma lain, theihtawp chhuah a ni a, Bial tinah MNF swrkar leh duhsaktu leh rinna nghattu an pung zel a. Hun hmasa lama MNF rawn zawmtu te chhiar tello pawhin tun October thla chhunga MNF a lo lut ringawt pawh hi mi 10000(Sing) chuang fe an ni tawh a ni. Hetianga duhsakna leh rinna min hlantu, Pathian leh kan ram tana thahnem ngai taka thawk tur kan nei zel hi kan lawmin, kan ram leh hnam tana thawh zel kan phur tlang takzet a ni.

“ZPM, Congress, BJP kalsan a, MNF huang chhunga ram rawngbawl hna thawk zel tur hian hmun ruak ala awm zel a, neutral atanga tha thawh duha rawn pen lut duh tan pawh MNF chu zau takin a inhawng reng a ni. Kan ram, kan hnam leh kan sakhua humhim tur MNF chuan hmalam a pan zel a. Kalphung nghet tha tak neiin, zuang lawr ve lovin, Mizo Nationalism tluanghrui vuan zelin MNF chu chak takin a kal zel dawn a ni,” tiin an tarlang bawk.